Ladins popul d'Europe

Tal an 15 denant la vignude di Crist, l'imperadôr roman August al mandà tal Noric i fiastris Drùs e Tiberi, par che cu lis lôr legjons a cjapassin dentri tal imperi i teritoris dal arc alpin di soreli jevât. Chestis zonis, logadis su la bordure par disore dal imperi roman, a jerin di fat lis antighis regjons de Rezie, regjons ch'a cjapavin dentri, cul Tirôl e cun part de Svuizare, il Trentìn, lis vals dolomitanis e la Furlanie. In chescj sîts a vivevin ints di stipite celtiche, ven a stâj di raze e di lengaç difarent dai popui dal Misdì, e aduncje tune posizion mezane, jenfri i cunfins dal mont latin e di chel gjarmanic, che si slargjave a tramontane, dilà des monts.

    La conseguence de penetrazion romane e fo che lis fevelis originariis, ch'a dopravin chestis popolazions, a scomençàrin un pôc a la volte a messedâsi e a fondisi cul latin uficiâl, burint fûr in cheste forme il basament di chel romanç che inmò si dopre in dì di vuê. Cussì, cun plene reson si po’ sustignî ch'a son plui di doi mîl agns ch'al è inviât il procès di formazion de lenghe ladine, tes sôs varietâts rumantscha, dolomitane e furlane.

    Ma al è purpûr vêr che in prionte de lenghe ladine e esist ancje une realtât ladine, realtât che poe lis sôs radîs no dome su la romanitât, ma ancje e sore il dut sun tune cristianitât sô particulâr, ereditade de Ete di Mieç, ch'e à vût te Glesie di Auilee il pont di riferiment principâl.

    E nol po’ jessi dabon un câs che lis vicendis dai popui ladins si sedin pal plui tignudis simpri dentri di une entitât pulitiche tradizionâl gjelôse de sô specialitâ, parvie di titui originaris e storics che no vevin dibot nuje ce spartî cu lis culturis e cul nazionalisim dai grancj stâts-nazion. Al vignarès di dî, la spie e l'anel di leamp cun tune antighe e marcade identitât etniche, che no je mai lade smavinsi dal dut. Cussì, ancje se si è puartâts a pensâ a la realtât ladine tant che a un alc di minoritari framieç des culturis europeanis majôrs, i Ladins invezit a puedin jessi clamâts il popul plui "mitteleuropean" de Mitteleurope: valadì di chê beorcje ideâl, dulà che ints di lenghe, culture e custumancis difarentis a rivin a cjatâ la fate di rispietâsi e di convivi parie in armonie.

    E propite ta cheste clime, la lenghe ladine e rive a cuistâ la funzion impuartante di mediazion e di leamp jenfri realtâts dispes aviersis e suspietôsis une di chê âtre. Par chest, se si rivarà finalmentri a dâ dongje la tant bramade Europe unide, ch'al sarès dutcâs plui just clamâle l'Europe dai popui, il model plui valent di riferiment al va cirût tes tieris ladinis, ta cheste nestre Ladinie.

La propueste puartade indenant tal Parlament di Rome, di tornâ a meti il crocifìs tes aulis di scuele, ta chês di justizie e di âtris publichis instituzions, 'e à daviert il dibatiment tra chei ch'a son favorei e chei ch'a son contraris, ancje in Friûl. Provìn inalore ancje nô a fâ cualchi riflession sun chest proposit.

    Cuanche, ai 18 di jugn dal 1940. Winston Churchill al comunicà ai Cumuns (il Parlament anglês) la fin de batae di France e il scomençâ di chê da l'Inghiltere, al visà che dal so esit e sarès dipindude: "la sorevivence de civiltât cristiane": La "Christian civilisation" al sarà  un argument ch'al vignarà fûr dispès tai discors dal timp di vuere di un tra i plui grancj statiscj dal secul passât. E cuanche la Russie e vignì invadude dai todescs, e lis armadis di Hitler a rivàrin ret Moscje, simpri Churchill al invidà Stalin a preâ: "Parcè che - al displeà - and'è moments dulà che ancje e cence-dius a prein". No si à mai savût che il ditatôr sovietic si sedi convertît, ma e je croniche testemoneade ch'al tornà a fâ viergi lis glesiis e i munistîrs, e ch'al invidà ducj a resisti ai naziscj tal non de tradizion. Ancje lui al saveve che la Sante Russie, come il rest da l'Europe, e jere fie dal cristianesim.

    E inmò, nol fo dabon un câs che l'unic vêr atentât cuintri il "demoni" nazist al fos stât organizât e metût in vôre dal ufiziâl catolicon von Stauffenberg, tal non da l'etiche religjôse. E cuanche, cualchi mês daspò che chel atentât al jere lât in struc, Parìs e vignì diliberade, ancje i gnostics, i panteiscj e i ateiscj si zontàrin a De Gaulle par asisti al Te Deum di ringraciament te catedrâl di Notre Dame. Ancje lôr, come Voltaire, a ricognossevin di jessi fîs de tradizion cristiane. Aduncje il crocifìs che si propon di tornâ a meti fûr tes aulis des nestris scuelis, al è il simbul di cheste civiltât, e par plusôrs resons.

    Parcè ch'a forin i predis a convertî i barbars cangjant la lôr ferocitât; parcè ch'a forin i fraris a ricopiâ i tescj classics conservant la memorie; parcè ch'a forin i scuelastics a valorizâ la Reson, condusinle a la filosofie; parcè ch'a forin i matematics e i sienziâts, di Galileo a Newton a Keplero, a cjatâ la fate par prins dai secrets da l'Univers, cu la sperance di rivâ a la cognossince dal so Autôr; parcè che par cuindis secui dutis lis arts europeanis, l'architeture, la piture, la sculture, la musiche, la prose e la poesie a forin, in principalitât, d'inspirazion religjôse. In sumis nô europeans no podìn no pandisi cristians.

Cundutachel tai ultins timps il crocifìs al jere un pôc a la volte disparît des nestris scuelis. Par colpe, no dal dubi filosofic, nì dal cjapâ pît di teologiis antagonistis, ma ben invezit dal benstâ, vêr nimì mortâl di dutis lis religjons e di dutis lis tradizions. J vevin cjapât la volte, tra la generâl indifarence, i manifescj maucs dal pinsîr debul: un cjantant rock, un rivoluzionari mitizât (come il Che Guevara justeapont), un zujadôr di balon o un atôr di cualchi telenovela. In sumis nol jere stât distrut, ma semplicementri lassât colâ in dismentie. Cu la complicitât ancje de Glesie, o ben di cierts siei rapresentants ecumeniscj. Un esempli sun chest cont lu vìn vût intant di une innomenade trasmission televisive (Porta a Porta n.d.r.), cuanche, in presince di un predi autorevul, un  musulman al à vût cûr di ufindi il crocifìs e la nestre religjon. Poben al à scugnût intervignî il filosof Massimo Cacciari a sierâ la bocje a l'arogant maometan. Valadì ch'al è stât il disdegn di un laic a salvâ chel pôc ch'al restave dal orgoj cristian.

    Vuê, magari cussì no in colpevul ritart, si rindìn cont che lis radîs de civiltât cristiane a son daûr a invidricîsi, sot l'efiet negatîf di culturis diviersis, ch'o stìn contrastant cun benevule tolerance. Dismenteant che la tolerance e je fie de tignince e de ferbince, senò in curt si cjatisi te condizion di scugnî tornâ a meti i fiêrs te fodre. E cuanche un popul al dismentee il so passât al à bielzà compromitût il so divignî.  (edelweiß)

(da "Ladins dal Friûl" n.11 Novembar 2002)

Patrie Furlane, Patrie Europeane

Ai 3 di avrîl e cole la "Fieste de Patrie dal Friûl" une iniziative metude sù tai agns daûr dal taramot dal 1976 di pre Checo Placerean e dal grop dai predis di Glesie Furlane, cuanche in tancj si cjatavin dispès te grande Basiliche di Acuilee a preâ, a sperâ e a progetâ un Friûl gnûf, un Friûl libar. La dade e jere chê che ricuardave il 3 di avrîl dal 1077 cuanche l'imperadôr Indrì IV, ch'al divignive de scopule di Cjanosse, al concedè al Patriarcje Sigjeart tal palaç di Pavie il diplome di Duche dal Friûl, ossei il ricognossiment dal podê temporâl dongje di chel glesiastic che bielzà a possedeve. Di chê volte la Furlanie, o miei la Patrie dal Friûl, e diventave un stât autonim ch'al durarà fintremai ai 3 di utubar dal 1420, cuanch'al vignì ocupât des armadis  di Vignesie.

    E inalore cjapìn cheste ocasion par meti jù cualchi pinsîr in libertât. O crodìn denant trat che sumiâ un Friûl un'âtre volte come stât libar al sedi pôc realistic. Vuê si cjàcare e si opare par realizâ une Europe unide, e i sengui stâts, nazionâi e nazionaliscj, a àn simpri mancul valence. Cirìn inalore di capî ce funzion ch'al podarà davuelzi il Friûl in cheste gnove instituzion sorenazionâl che si è daûr a costruî. Si scugne rispuindi a cheste domande se si vûl dâ a la nestre "Patrie-Regjon" une funzion e une dignitât che la storie presint e in divignî j à distinât cence colâ tal facil realisim di cui ch'al acete rassegnât l'esistent cence obiezions di sorte.

    Aromai al è simpri plui evident che la costruzion europeane, fondade sul pat di stabilitât economiche-finanziarie dai sengui stâts, e da di viodi des dificultâts ogjetivis che a son dificilis di superâ tun prossim divignî par cierts vizis sostanziâi presints tal istès procè di unificazion.

    In fats la sempliç trasposizion dai centris decisionâi a nivel comunitari in organisims di consultazion tra stâts come la Comission Europeane o la Bancje Centrâl Europeane no po’ che riprodûsi i vizis e i difièts zà presints tes originariis instituzions statâls.

    Si trate in principalitât di entitâts statâls te plui part di divignince cetant lontane tal timp (il Vocent), come l'Italie e la Germanie, conseguence di un concèt nazionalist dal ordenament civîl dulà che in cierts câs, Italie e France sore il dut, si palêse simpri plui intrigôse la cunvivence di un sistem centralizât di esercizi dal podê cu lis spietis e lis aspirazions economichis-sociâls che a divegnin des diviersis realtâts culturâls, i popui da l'Europe, che a son, o ben che a varessin di jessi, la struture fondant da l'Union.

    L'Europe che nô autonomiscj-furlaniscj o intindìn costruî no je dal sigûr cheste Europe, che si pant simpri plui come un stramontâsi di vieris e musars stâts dulà che a son presints fuartis resistencis autoconservativis e centralistis, ma e je l'Europe dai popui, valadì di culture e di valôrs che o vulìn preservâ e prudelâ. O crodìn cussì che se di federalisim si à di fevelâ chest al vadi  intindût a nivel european e no dal sigûr a nivêl nazionâl (italian) parcè che dome cussì o podarìn costruî une Europe pardabon solidâl e fuarte tes sôs perspetivis di svilup.

    Nò. aduncje, a l'Europe dai bancjirs, a l'Europe dal contigniment dal rapuart PIL-debit public, a l'Europe dai diktat su lis pensions, a l'Europe dai speculadôrs.

    Sì invezit a une Europe dulà che a sedin valorizadis lis sengulis culturis e etniis, a l'Europe dai piçui produtôrs, a l'Europe dai artesans e dai contadins, a l'Europe dai sgambis no dome economics ma ancje culturâi, sì a une Europe ch'e sedi espression de ricjece dai popui che la mètin adun, che di masse timp aromai a son slaifâts tes lôr potenzialitâts dai vieris stâts nazionâi.

    O domandìn par chestis resons come Furlans al Stât italian, che nus à strissinâts in dôs vueris no voludis e par nô cetant disastrôsis, la libertât di esercitâ il nestri dirìt di jessi europeans. In gambi i concedìn i podês di sempliç coordinament des pulitichis europeanis di svilup che a saran decidudis a nivel comunitari.

    Pôcjis e precisis competencis aduncje ai stâts nazionâi, tantis e articoladis ai sengui popui che a varàn di jessi ducj rapresentâts in Europe in maniere adeguade tignìnt cont des lôr particularitâts: il Parlament European al varà di jessi elèt su base regjonâl e no sun chê nazionâl e il Guviêr da l'Europe al à di jessi l'espression dai popui e no dai stâts.

    Intant ai 3 di avrîl no stìn a dismenteâsi di meti fûr dai nestris balcons la bandiere furlane, chê colôr blâf cu l'acuile patriarcjâl, ch'e à il stès colôr di chê da l'Europe : justeapont Patrie Furlane e Patrie Europeane!

(edelweiss)
Tirât fûr da "Ladins dal Friûl" n.4 Avrîl 2003

La polemiche sul fat che si vès di meti dentri un riferiment 'es "radîs cristianis" da l'Europe tal preambul de gnove Constituzion europeane e je in realtât une dispute plui impuartant di chel che si crôt. Chest argument al viôt scontrâsi plui sogjets: i cristians-catolics, unevore impegnâts parcè che chest riferiment al vebi di figurâ tal at di fondazion de fradae europeane: i cristians no catolics (valadì i riformâts des diviersis confessions e i ortodòs), mancul interessâts a chest ancje parcè che in genar difidents rispiet a une certe tindince a l'egemonie, propie dai catolics: i citadins europeans ch'a codrin in âtris fedis,  sore il dut maometants e ebreus, ch'a àn pôre, e no cence mutîf, che la declarazion relative 'es "radîs cristianis" e puedi rapresentâ par lôr un prejudizi, cul riscjo di  fâju diventâ "europeans di serie B"; e in fin i laiciscj, i agnostics, e ateus, preocupâts dal fat che il ricognossiment des radîs cristianis da l'Europe si tradusarès tune sorte di rivincite cristiane sul procès di laicizazion che de mitât circje dal Sietcent al è un dai components significants de storie dal nestri continent.

    Cundifat, e je une veretât incontestabil che la nestre storie e je fate di difarencis e di specificitâts plui che senò di resons e caratars tindins a l'unitât e al vuajament.

    Nì si po’ cjatâ la fate a chest slaif proponìnt un riferiment  a la culture "ebraiche-cristiane", invezit che dome cristiane. In efiets, dal pont di viste cristian l'ebraisim al è cence âtri "colegât" al cristianesim. Chest dutcâs nol cancele passe doi mîl agns di storie, di tensions, di persecuzions: dal pont di viste ebraic, un riferiment di cheste sorte al podarès palesâsi un rimiedi ch'al è sot cierts aspiets piês dal mâl.

    L'identitât europeane no à nuje di naturâl: no si sintisi europeans dome parcè che si è nassûts tal  continent european. E, di chê âtre bande, il stes fat di pensâ il mont disferenziât par continents al è il risultât de culture europeane. Tal mont de Ete di Mieç, cun dut che la distinzion in continents (puartât de culture greche) e fos bielzà cognossude, no si sintivisi "fiis" dal continent european: ma,  semai, de "Cristianitât".

    La cussience europeane e nas a scomençâ dal Cuatricent, de dibisugne da l'Europe cristiane di apartignince "romane", ossei di sintîsi in cualchi mût unide: no tant te tradizion romane-gjarmaniche, no sintude in maniere slargjade e indebulide dal indebuliment des funzions da l'Imperi ch'al stave diventant simpri plui "todesc", ma ben invezit in chê de culture latine, de cumun apartagnice e obedience a la Glesie di Rome e de necessitât di difindisi de grande menace rapresentade da l'invasion dai maometans turcs. In chest e vè cence âtri une funzion di fonde la cussience profonde des radîs cumuns: chê de lenghe latine ch'e jere restade la lenghe "alte" des universitâts, des canceleriis pulitichis e sore il dut dal dirìt.

    Cheste ereditât cumun e je stade plui voltis superade e lassade colâ in dismentie; il mosaic Europe le à plui voltis rineade e tradide tes sôs plusôrs vueris civîls, dal Cincent al Nûfcent (l'ultime in ordin di timp e je stade chê cetant tragiche dai Balcans). Cumò, al è rivât il timp da l'unitât e de fradelance. Il ricognossi in chestis radîs nol à cussì di jessi  sintût come un at di fede religjôse, ma ben invezit come un gest di ricognossiment e di ricognossince. In chest sens, adimplen laic al di là de personâl apartignince religjôse, o sìn obietivamentri da l'opinion  che il Preambul de gnove Constituzion al varès di vê iniment il tant che la nestre Europe e sedi in vê di dâ a la fede di Crist.

 (tarvos

A GURIZE CENCE PLUI MÛRS          

 Cul prin di mai, l'Union europeane 'e à gambiât filusumie, fronteris. Si è slargjade a vot Paîs da l'Europe di jevât, plui Cipro e Malte. I sorestants di Rome a tìndin a no dâ grande impuartance a chest acjadiment par nô furlans dabon fondamentâl, senò âtri parcè ch'a còlin finalmentri i mûrs innaturâi ch'a dividevin Gurize: la Slovenie e je justeapont  un dai dîs Paîs ch'a son jentrâts te grande famee europeane. Un mosaic cetant biel al à cjapât la volte a la spaltade che par agns 'e à dividût la grande place de stazion de ferade Transalpine. Un mosaic al puest de filiade  ch'e je stade il simbul de division des lenghis e des culturis, tun teritori che la nature e veve distinât a jessi un puint dulà incuintrâsi e donâsi reciprochementri lis propiis ricjecis.

    Un segn di grande sperance duncje ch'al ven a rimarcâ che dentri cualchi an al sarà pussibil passâ di Gurize a Gnove Gurize cence nancje mostrâ la cjarte d'identitât, mentri in âtris sîts dal nestri Planet i mûrs a rèstin e an vegnin tirâts su fintremai di gnûfs.

    Il cunfin in sumis al è materialmentri disparît e chest al è cence âtri cetant pusitîf ma no vìn istès di inludisi che chest al cjati la fate a ducj i problems. Al è invezit di crodi che il cunfin al larà dilunc a esisti te ment di cetantis personis, di une bande e di chê âtre, almancul fintremai a cuant che no rivarìn a diliberâsi des fantasimis nazionalistis dal passât imparant a jessi tolerants par superâ i prejudizis, i schemis mentâi e i preconcèts ideologjics par rivâ a comprendi lis resons e il vivût di chel âtri. La disparizion des spaltadis no po’ valadì ridusisi a une cuestion instituzionâl ma e varà di jessi compagnade da un sgambi seguitîf fra i citadins di Gurize e di Gnove Gurize in ducj i aspiets de vite di ogni dì.

I vantaçs, al di là di chei economics, a varàn di podê jessi di ordin pratic, leâts, cemût che si à vût iniment denant trat, a la vite pratiche di ogni dì dai citadins. Pensìn par esempli a la pussibiltât di rivâ a creâ un unic centri sanitari ch'al meti in colaborazion direte lis struturis dai ospedâi di Gurize e Sempeter, in grât cussì di furnî servizis  di alte cualitât secont lis specifichis competencis, ma al semee di capî che sun chest cont, almancul par cumò, e mancji un precise volontât pulitiche viers cheste direzion.

Tirât fûr da "Ladins dal Friûl", n.5 Mai 2004

Friûl : riferiment fondamentâl  pe gnove Europe

 
Passadis lis fiestis e la balfuerie retoriche o crodìn ch'al sedi il timp par cualchi  sclete riflession  sul resìnt slargjament a Jevât da l'Union Europeane. And'è dôs manieris par frontâ chest slargjament : tirâ sù spaltadis par slaifâ l'emigrazion dai citadins dai dîs gnûfs Paîs associâts, cemût ch'a àn fat i guviêrs dai Cuindis, opûr costruîs puints tra la viere e la gnove Europe. Dal prin di mai stât ta l'Union Europeane o sìn passâts da 15 a 25 Stâts, da 380 a 454 milions di citadins plusôrs lenghis e gnovis fronteris viers misdì e a jevât. Chest al compuartarà l'esigjence di une gnove ecunumie in Europe, ma ancje di une gnove integrazion tra i diviers popui e i grops etnics minoritaris.

Al è palês che chest slargjament nus imponarà dai coscj, ancje pesants dal pont di viste finanziari, ma che pàin la pene di jessi sapuartâts. Dutun in chel nus ufrirà gnovis oportunitâts: cul slargjament si moltiplicaràn lis perspetivis d'incressite economiche tai gnûfs stâts associâts e ancje tai chei âtris stâts si vierzaràn gnûfs marcjâts dulà ch'o podarìn espuartâ i nestris prodots. Par chestis resons il nestri rapuart cu l'Europe unide al varà di jessi pusitîf e daviert tune Comunitât no dome de cunumie, ma ancje dai popui.  Une viertidure che no dovarès jessi indificil di realizâ s'o tignìn cont che chei jentrâts a son popui di antighe tradizion europeane parcè ch'a àn storicamentri une religjon e une culture avuâl 'es nestris cun tune buine fonde imprenditoriâl.

Par no creâ falsis inlusions, o tornìn a ripeti  che almancul par cualchi an a saràn plui i disvantaçs che no i vantaçs che nus divignaràn di chest slargjament, e o scugnarìn impegnâsi no pôc par vualivâ chescj efiets, ma tai timps luncs i vantaçs dal sigûr no mancjaràn

L'Europe di Jevât e rapresente une frontere ricje di svilups e di pussibilitâts: o podìn jessi presints tai gnûfs Stâts cu lis nestris tecnologiis, o podìn puartaur la nestre esperience, rispuindi al lôr desideri di podê rivâ a chel grât di benstâ, di svilup e d'incressite culturâl che no chenti o cognossin di un biel pôs di agns in ca.

    Il nestri Friûl si cjate esatamentri te beorcje dal dopli as, nord-sud e est-ovest, ch'al met in cumun lis economiis dai vieris e dai gnûfs associâts. Ma il trasformâ i disvantaçs potenziâi in vantaçs reâi nus domandarà un sfuarç ancje infrastruturâl, ma sore il dut une inversion di tindice de capacitât de nestre Regjon di tradûsi i interès economics in progèts definîts e in tune strategie valent par metiju in vôre.

In cheste suaze - o tornìn a ripetisi - il Friûl, pe sô lungje esperience di relazions cui Paîs dai contôrs e cui marcjâts di dut il mont, pe sô maduritât economiche, sociâl e culturâl e pal so impegn european, al podarà vê un pês e une impuartance cence âtri di rilêf. Chê ch'e jere une Regjon "sul cunfin" e sarà di cumò indenant la vanguardie da l'Europe te areis bagnadis de Donau. Graciis a la nestre naturâl vocazion transfrontalere e a la  funzion di riferiment logistic dai trafics comerciâi ch'a van viers i Paîs dal Centri-Est Europe, o podìn concori a costruî un sistem economic e teritoriâl dulà podê organizâ il nestri vantaç competitîf tun rapuart di cooperazion cun chês âtris areis geografichis, massime cu lis daprûf Carintie e Slovenie te fraternitât viere e gnove di Acuilee patriarcjâl.  (tarvos)

Tirât fûr da "Ladins dal Friûl", n.6 Jugn2004

Une Constituzion par sintîsi europeans

Il sium dai "paris da l'Europe", che tai prins agns cincuante a inmaginavin che il nestri Continent al podès rivâ a une unitât no dome geografiche e economiche, ma ancje pulitiche al à in fin cuistât concretece. Ai 29 dal mês di utubar stât i majorents di Stât e di Guviêr dai 25 Paîs da l'Union a àn firmât a Rome la Constituzion europeane. Ma parcè che il sium al diventi realtât, al coventarà di spietâ dutcâs che cumò chest impegnatîf document al vegni fat bon in ogidun di chescj Paîs.

    La peraule e passe aduncje ai popui, ch'a decidaran a traviers i propis Fevelaments nazionâi o, come ch'al sucedarà in almancul dîs Paîs, mediant un referendum. Infin o varìn, ai 15 di dicembar cu ven, il vôt definît dal Fevelament european tirât adun in sentade plenarie.

    Al di là dai pros e dai cuintris (che no son dabon pôs) sun chest "progèt di Constituzion" al è just memoreâ che tante strade e je stade fate: la pâs tra i popui dal Union e je un dât di fat unevore pusitîf, il mûr di Berlin al è lât jù, mandant sui paradôrs il scuintri ideologic fra Est e Ovest, l'Euro e je la nestre monede, ancje se nus coste cetancj sacrifizis, âtris dîs gnûfs Paîs a son di resìnt jentrâts a fâ part da l'Union e âtris inmò a son in spiete di jentrâ. Tal marimont lis spietis tai rivuarts da l'Europe a son cetant grandis.  
 

Al di là dai pros e dai cuintris (che no son dabon pôs) sun chest "progèt di Constituzion" al è just memoreâ che tante strade e je stade fate: la pâs tra i popui dal Union e je un dât di fat unevore pusitîf, il mûr di Berlin al è lât jù, mandant sui paradôrs il scuintri ideologic fra Est e Ovest, l'Euro e je la nestre monede, ancje se nus coste cetancj sacrifizis, âtris dîs gnûfs Paîs a son di resìnt jentrâts a fâ part da l'Union e âtris inmò a son in spiete di jentrâ. Tal marimont lis spietis tai rivuarts da l'Europe a son cetant grandis.

    Cundutachel e je ancje vere che i citadins si spietin da l'Europe dai pas inmò plui concrets  e  ferbints  su  la  trate  de   propie integrazion.    Come ch'e je istès vere che la Constituzion, pûr infuartint la presince da l'Union europeane su la sene internazionâl, no rive a imbastî e a consolidâ un vêr e propi "Stât european", indotât di une pulitiche foreste, di une pulitiche sociâl, di un guviêr de cunumie ch'al comprindi ancje la fiscalitât. E je purpûr vere, infin, che in ognidun di chescj cjamps di competence la Constituzion e propon dai significants progres. Sore il dut, nus permet di comprindi ce ch'al vûl dî jessi "citadins europeans": al vûl dî par esempli cundividi i valôrs cumuns de dignitât umane, de libertât, de democrazie, de avualitât, dal Stât di dirìt e dal rispiet dai dirìts umans e des minorancis (etnichis o religjôsis ch'a sedin). Al vûl dî impegnâsi, ducj, tal prudelâ e promovi la pâs. Al vûl inmò dî impegnâsi pe realizazion di un sistem economic  ch'al smiri a la plene ocupazion e ch'al rispieti l'ambient, ch'al scombat la discriminazion sociâl, che si fonde su la paritât tra oms e feminis e su la solidarietât fra generazions.

    Cheste Constituzion, magari cussì no, no cree par cumò un chel Stât Federâl che come autonimiscj furlans tant o bramìn, ma e segne almancul la nassince di une Europe pulitiche. E purpûr no esistìnt inmò une "Nazion Europeane" e pûr ametìnt che no si po’ inmò fevelâ di "popul european" al è di sperâ istès che ogni citadin al puedi ricognossisi in cheste "Magna Charta da l'Europe", ch'e stabilìs i nestris dirìts e i nestris obligs e che nus disferenzie di front a ducj. A ducj vuâtris Bon Nadâl e Bon An Gnûf 2005!   (tarvos)

 Tirât fûr da "Ladins dal Friûl", n.12 Dicembar 2004

W l'Europe dai popui e des minorancis

    Parcè che vuê la funzion e l'utopie di Insìc e de sô fieste a cuistin inmò plui valôr e si cjamin di significâts creis par plusôrs agns inmò. Parcè che Insìc e lis sôs ints a puedin dâ inmò un impuartant contribût ae travaiade storie di chê part di Europe che ducj aromai a clamin Mitteleurope, puartant magari dai sugjeriments al radicâl procès di trasformazion in at intal lessic e inte sintassi dal codiç di incressite soci-economiche di chescj teritoris.

    A’nd è insedât tal anim un sens di riscuvierte e di sperance, che e puarte tante int e tantis ints tal broili di Insìc: la riscuvierte di une identitât comun, la sperance di podêle vivi inte diviersitât. Chest al è il messaç di Insìc, chest al è il so sens. E nus semee impuartant sotliniâlu in chescj timps, cuant che l'Europe politiche e zonte gnûfs tassei al so mosaic di unificazion, e cuant che l'Europe dai popui e domande che in chest mosaic a cjatin puest, e il rispiet che a mertin, ancje i tassei plui piçui, lis “piçulis patriis” e lis minorancis.

                                                                                                                                     (renzo balzan)

Tirât fûr da “Ladins dal Friûl”, n.9 Setembar 2006