Sëlva / Wolkenstein Gröden (Bz) - Intai paîs de Ladinie dolomitane ai 5 di Dicembar si celebre la fieste di San Nicolau, che al à aduès i vistîts sontuôs dal vescul e al rêç in man il pastorâl. Al è in companie di une frutate cun viestis di agnul. Chescj a fasin visite ai fruts munîtju, se al covente, pes lôr baruchelis e dant fûr po daspò i bramâts dons. Cul passâ dal timp ai doi si è zontade la sunsurose e scampanelant companie dai “malans”. Chescj demonis neris e sporcjâts di frusin, a son cuvierts di piels, e a puartint une mascare “a brut” di len di dulà che a vegnin fûr doi cuars di cjavre. A son furnîts di sampogns, cjadenis e a fasin sgurlâ cun fâ menaçôs une vergule. I demonis a fasin pensâ a ciertis vieris tradizions paianis, po ladis a insedâsi inte fieste cristiane di “San Miculau” (in Val Badie al è clamât: “San Micurá”); un rît arcaic cul cuâl si pensave di sconzurâ lis fuarcis dal mâl presint intai mês de Sierade.

    Tal Fodom, cuant che San Nicolau no si faseve inmò viodi di persone, i fruts la sere dai 5 di Dicembar prime di lâ tal jet a vevin di poiâ su la taule de “stua” des scudielis o dai plats. E inmò, un pôc di fen e lis scussis des cartufulis che a vevin si coventâ pas passi il mus di San Nicolau. Cuant che i fruts a durmivin la mari e jemplave lis scudielis di siops e a voltis cun dai scarpons e marcave des olmis ator de cjase, e ai fruts si faseve crodi che a fossin chês lassadis dal sant.

    In Val di Fasse, la stesse zornade, une sdrume di fruts, furnîts di sampogns, e bailave dilunc lis stradis dai paîs e a sturnive la int fintremai sore sere. Dicembar al jere il mês des messis matutinis dal Avent (par ladin: “Gúldanomp” e par todesc “Rorate”).

    Tai agns vincj dal secul passât e à tacât a cjapâ pît la usance de “gherlanda d’Avënt). La corone dal Avent e je instreçade con rami simpri verdis e e je furnide cun cjandelis, tun numar avuâl aes setemanis che a mancjin a Nadâl. Ogni setemane si impie une cjandele. Cheste usance, nassude in Gjermanie dal incrosâsi di diviersis costumancis, po e rive ancje in Austrie, ma, a pene daspò la seconde vuere mondiâl e scomence a cuistâ un acet popolâr. Di alì in fin e scomence a cjapâ pît ancje intes localitâts de Ladinie dolomitane.

    In Val Gardene il timp dal Avent al è cadençât di une rieste di ricorencis tradizionâls. Ancje achì e je slargjade la usance de aree todescje de “Klöckler” o “Klöpflernächte”. I joibis dal Avent sore sere, grups di fantats a lavin di cjase in cjase a cjantâ la “Tlecanocht”, cuistant in cambi dai dons. Une volte a cjâf  dal  grup  al  jere  un  fantat  cu  la ghitare o cu la armoniche,  cun  daûr  un  vieri paur cu la sô “viele”, po il bacan cu la bacane e in fin il mataran. A voltis il grup si completave cuntune copie viestude cul costum dai fodoms di La Pli.

    La setemane denant Nadâl e jere clamade: “l’ena dal rainesc” (la setemane dal florin renan, une antighe monede austriache di aur). Si diseve cussì parcè che bisugnave lavorâ plui dal solit e vuadagnâ almancul un “rainesc”, co dilunc de setemane sante nol jere permetût di lavorâ plui di chel tant. In chestis zornadis si jere solits copâ il purcit, salâ lis cjars e il speck (par gardenês al è clamât: “ciociul”). Se cualchidun che al stave dongje, o pûr se cualchidun de parintât no lu faseve i vignive proferît un “gost”, o sei une bocon di cjâr. I paurs che dilunc dal an a vendevin il lat, a Nadâl lu ofrivin, cussì al jere clamât: “l lat da Nadel”. Chest custum al cuistave un significât di amistât e di pâs, se si veve cjatât da dî cun cualchidun. Al contrari, se no si veve voie gran di fâ la pâs cun cualchidun, no si dave il lat in don.

    Ae vee di Nadâl si prepare il presepi e il peç , che une volte nol esisteve e dome intes fameis plui abenadis si faseve il presepi. Il peç di Nadâl al diven dai Paîs di tramontane. I Svedês lu àn puartât dilunc la vuere dai Trente agns (prime mitât dal secul XVII) in Gjermanie, dulà che par altri al à scomençât a cjapâ pît dome ai prins dal Votcent (ancje se l’ûs di preparâ intes cjasis un peç a Nadâl al è testemoneât tra lis usancis de citât di Strasburg tal 1605).

    In Val Badie dut câs il pari judât dai fiis al preparave “l’altè”: l’altâr de stube. Si tiravin adun dutis lis imagjinis sacris presints in cjase che po e vignivin disponudis dutis insiemit intun cjanton dal tinel. Suntun riplan tal mieç si meteve une piçule statue di len di Jesus Bambin e in bande si metevin des cjandelis.

    In Val Gardene, ai 26 di Dicembar, i zovins che l’an daspò a jerin coscrits a vevin la braure di pontâ sul cjapiel une mieze code di pernîs. Inte stesse zornade a lavin cuntun staruc a cjapâ le aghe sante di Sant Stiefin e ogni famee e mandave a benedî un sacut di sâl. I paurs de Val Gardene plui abenâts in cheste zornade a organizavin une spassizade in slite intai paîs daprûf.

    Ancje in cheste ocasion il paron di cjase al faseve il zîr di dutis stanziis a benedî cu la aghe sante. Cheste pratiche po la ripeteve ancje inte stale  e tal toglât. E siervive par sconzurâ i triscj vôi e par slontanâ ogni altre disgracie. Ai 27 di Dicembar, San Zuan, i parochians a lavin in glesie pe benedizion dal vin intant messe. Chest vin al vignive po bevût dilunc il gustâ.

(Test tirât fûr da dal saç “Mumënc de Vita / Momenti di Vita” di Marco Forni - traduzion e adatament di edelweiß)