Tamau / Tischlbong - Il mês di Otubar e il mês di Novembar stât ator pal Friûl al è stât dut un dâsi la volte di presentazions di libris, conferencis, dibatiments, mostris, cunvignis e ce sul teme dai novante agns che e jere rivade insom la “vitoriose” prime vuere grande. A dîle sclete al sarès stât pôc ce celebrâ, co chê vuere alì pe Furlanie e je stade une disgracie grandone. Pai muarts, pai dams, pes umiliazions che e à scugnût paidî la nestre int, cence rigjavâ in cambi nissun vê di vê che al ripaiàs une cussì grande pene. A clamâle vitorie al vûl dabon un biel coragjo, ma si sa che la retoriche nazionaliste no cognòs slaifs. Une situazion straviade, cheste, che o stin paiant inmò in dì di vuê, co i furlans a scugnin continuâ a recitâ la part dai grancj patriots, a declarâ a ogni pît alçât il lôr grant amôr pe “piçule” e pe “grande” patrie. Un malintindiment, chest ultin, che nus lambiche cence remission e che no si rive a vualmâ redenzie par podê diliberâsi di lui.

    Une riflession su dut ce che o vin dite denant trat nus jude a fâle un biel libri publicât za mês indaûr dal Istitût di Culture Tamauese e titulât “Il Tempio Ossario di Timau”. Il lavôr, penç 262 pagjinis e realizât alì de stamparie Cortolezzis di Paluce, lu àn impen curât Mauro Unfer e Rocco Tedino. La publicazion, juste apont, e rapresente une impuartante vore di testemoneance e di recupar par furnî la cognossince dai plusôrs acjadiments leâts ae storie dal antîc Santuari dal Crist di Timau, tirât sù come glesie tal 1200, e po plui voltis modificât. In fin, daspò distruzions e fûcs, tal 1937 al vignì  ingrandît e adatât a Templi Ossari. Cussì dentri vie a vignirin sistemâts i rescj di 1774 soldâts muarts inte prime vuere grande, o sei 1701 talians e 73 austri-ongjarês.

    I autôrs si fermin justementri a esponi lis resons che a puartarin ae decision di fâ dal vieri Santuari dal Crist un Templi Ossari, e a riclamin sun chest cont la figure di pre Tite Bulfon, “storic” plevan di Tamau, che al cuistà innomine parcè che, la volte che intai mês di Lui e Avost 1935 la Comission che e veve la cjame des Onorancis ai muarts in vuere, su disposizion dal ministri competent, e de disposizions parcè che a vignissin dismetûts i simitieris di vuere provisoris sparniçâts dilunc lis zonis dal front, cul conseguent recupar dai rescj par podêju sistemâ in sacraris di pueste, si impegnà par fâ in mût che i soldâts muarts su lis monts parsore Tamau a restassin a polsâ in chel lûc. Graciis ae poie di un pôcs di sorestants pre Tite al podè in fin a imponi il so progjet. Tant par dî fintremai il pape di chê volte al fasè rivâ al Templi cualchi toc di preseose mobilie.

    Fevelant di Tamau e de vuere grande il libri nol podeve naturalmentri no vê iniment la vicende des “portatrici” cjargnelis, che cul zei sù pe schene a puartavin mangjative e munizions aes postazions logadis sù pes cretis, dilunc la linie dal front. Su chest cont une atenzion particolâr e je riservade a tamauese Marie Plozner Mentil, muarte a 32 agns par colpe di une palotule rivade des postazions aviersis. Il martiri di Marie Plozner Mentil, che e à vût la medaie di aur ae memorie, al è memoreât dentri vie dal Templi cuntune rapresentazion pitoriche, oltri che cuntun monument dedicât ae stesse a Tamau.

    Oltri a chescj “fats di vuere” a son in prionte cetantis lis vicendis riclamadis tal libris e lis documentazions ripuartadis, come testaments privâts, relazions su visitis pastorâls, precets religjôs, statûts pai abitants, ducj vieris dai secui passâts e che a rapresentin la testemoneance de realtât sociâl e des regulis che esistevin pal ordenât vivi parie di cheste comunitât, di antighe divignince carintiane tant che si fevele ore presint un lengaç alt-todesc (tischlbongarisc), dal pont di viste economic, juridic e religjôs.

    Il Templi Ossari o Santuari dal Crist di Tamau, cemût che al risulte documentât in maniere slargjade tal volum, al è purpûr il riferiment di piligrinaçs votîfs di comunitâts dai contors che, partint in prucission dai paîs de Gailtal, o ben di Culino, For di Voltri, Gjviano e di altris vilis de Cjargne, a rivin preant e cjantant fint a Tamau a traviers trois di mont une vore intrigôs.

    Il libri al è purpûr integrât da materiâl iconografic a fins ilustratîfs e di documentazion. La part da pît e cjape dentri in fats notis biografichis riferidis a artiscj che, cu lis lôr oparis, a àn insiorât dal pont di viste artistic il Templi. In efiets si trate di nons impuartants tant che Giannino Castiglioni, Giovanni Greppi, Piero Fragiacomo e Cesare Laurenti.

    La opare e rive insom cu la elencazion complete dai soldâts custodîts, cu la indicazion de date di muart, la unitât militâr di apartignince e i eventuâi ricognossiments al valôr.

Gurize - Da vinars 24 di Otubar a sabide 8 di Novembar, alì de galarie dal Kulturni dom di Gurize, e je restade vierte une cetant interessant mostre documentarie dal titul “Primož Trubar (1508 - 1586): un grant european di scuvierzi”.

    Trubar al nassè a Rasica, vile dal Cragn disot, tal 1508. A 12 agns al bandonà la cjase di famee par lâ a studiâ prime a Flum, po a Salzburg. Un passaç impuartant de sô vite al è leât ae sô presince a Triest, dulà che al studià ae scuele dal vescul Bonomo par po lâ dilunc cui studis a Viene. Tal 1530 al vignì ordenât predi. Plui indenant si svicinà al luteranisim e al deventà il plui atîf animadôr de riforme protestante in tiere slovene. Tal 1550 al publicà il prin libri in lenghe slovene e par chest al ven considerât il pari de leterature slovene. Al è autôr di oltri 25 libris, tra chescj i plui impuartants a son lis traduzions dal Gnûf Testament e dai Salms. Al murì tal 1586 a Derendingen in Gjermanie, dulà che juste apont al è soterât.