Çurçuvìnt - La crame (o crassigne) dai cramârs, cui siei cassetins, e je come la crame dai ricuarts che ognidun di nô al possêt, cuanche chei piçui cassetins tu ju scomencis a viergi to nu puedis fermâti. A chel pont al ven fûr ce ch'al à di vignî fûr, e i risultâts a puèdin jessi biei e bruts, ma in ogni câs adimplen sancîrs.

    Par fâlu bisugne vê cûr opûr incussience. Tal câs di Gigi Maieron, che zà fa cualchi mês al à fat vignî fûr de stamparie "La neve di Anna" (Ed. Biblioteca dell''Immagine, pp. 165, 12 euros) al è di scrupulâ ch'e sedi buine la seconde ipotese. "Cuanche l'editôr - al scrîf te so jentrade - mi à proponût di meti tun libri la mê trate di musicant-cjanteautôr, o soi lât a ricercjâ tal salâr de memorie e o ai cjatât une lungje rieste di fats ch'a mertavin di jessi contâts. Ducj i acjadiments a partivin de mê famee, dal nôno e di mê mari, musicants par ben 48 agns".

    La musiche, in sumis, no dome e je il presint di Maieron e dal sigûr il so avignî, ma e je stade l'element di fonde ancje dal so passât, fintremai di puem, tune mosfere amniotiche che lu vuluçave, ch'al asedave, ch'al veve insedade insot dentri di lui, intimamentri.

    In chest libri, aduncje, la musiche e je une presince costant, un fîl chal va disberdeansi e ch'al compagne il davuelgisi dai ancjadiments. Dutcâs al sarès fûr di troi cui che leint chestis pagjinis al fos puartât a pensâ che Gigi Maieron al vebi metût jù su la cjarte dome fats e ricuarts leâts al so impegn artistic. Chest diari sclet, invezit, al cjape dentri sore il dut il contâ dai fats de vite, il ricuart di proverbis  dâts sù simpri cun consapevulece, aurîts a la risultive de savince popolâr.

    Anzit, chest libri al divente part integrant da l'opare complessive di Maieron, parvie ch'al rive a fânus comprindi che dentri chês musichis ch'o vin dispès scoltât e daûr di chês peraulis ch'a dan gnerf e significât al cuarp des notis, e je l'anime di une vite vere e vivude cence compromissions fintremai dapît.

    Dal rest nol è afàt inconsuet che un artist al rivi a dâ buinis provis di sé no dome in chel ch'o podìn considerâ il so impegn primari, ma ancje a esprimisi in âtris formis  di espression artistiche. Cundutachel a son pôs ch'a riscjin di jessi dal teritori dulà ch'a son parons par lâ a scrutinâ un mont ch'al è parâtri siguramentri nestri, ma ch'al reste scuasit simpri inesplorât parvie che normalmentri o stìn daûr a une sengule olme par volte, parvie che dispès o sìn masse  controlâts  e  blocâts par lassâsi travanâ dutun in chel di sensazions di gjenar diviers.

    Epûr al è come insumiâsi a colôrs impen che in blanc e neri. Al è come zontâ 'es inmaginis e ai suns elaborâts dal nestri jessi plui intim ancje nulôrs, savôrs, sensazions. Al è come puartâ tai siums ancje chê musiche ch'e rive a sotlineâ, cu la sô mudevul sensibilitât, lis diviersis azions dal film. Ancje s'o fasìn une cierte fadie a rindisi adimplen cont, la voe di saborâ ducj i sens insiemit e je insedade te nestre indule  ma a voltis, in ciertis ocasions de vite normâl, chest compagnament musicâl  al ven dibot a mancjâ.

.     

Chê di Maieron e je musiche che no lasse indiferents e cussì nol lassè istès indiferents nancje il so libri "La neve di Anna", sevi pe sostance, sevi pe forme. Impuartant in cheste opare, infats, e je ancje la cualitât dal scrivi. Ancje in chest Maieron al è par cierts aspiets une sorprese. In part, parcè ch'al ves cunfidence cul scrivi e cul savê contâsi o podevin ancje induvinâlu des sôs poesiis ("Orepresint" / Ed. Comunitât di Mont de Cjargne) e dai tescj des cjançons ch'al à scrit. Ma la trate narative di un libri e je ben plui lungje e complicade di une poesie e di une cjançon. E scugne sei sapontade di un respîr naratîf superiôr che Maieron al à dât di viodi di possedi. Il stîl al è sclet, sut, ma ancje travanât di une cierte ande poetiche, cussì di rivâ a creâ ambients e mosferis, a animâ e fâ movi i personaçs, a displeâ situazions cun tune ande e un stîl bogns di rindi profonditât di analise e altece di sintiments. Il dut filtrât a traviers ricuarts ch'a restin marcâts te memorie ma che sore il dut a àn finît di marcâ il caratar e lis cunvinzions. E, infats, Maieron scomençant chest libri al pant: "And'è ricuarts che no sielgin la memorie par tornâ. A son simpri presints come une seconde piel, cun cualchi grispe di subite. Nol è dome il vivût o il segn dal timp ma e je la vite, ch'e lasse lis sôs olmis cence dâ spiegazions di sorte".

    Daspò tantis lauts une osservazion o scugnìn pûr fâle: se la "La neve di Anna" si fos clamâde "La nêf di Ane", e par conseguence e fos stade scrite zontefûr par furlan, e sarès stade une opare dabon di rilêf te cente de leteradure furlane in marilenghe, degne siguramentri di vinci un premi leterari impuartant come il "San Simon" di Codroip, dulà che parâtri Gigi Maieron al à zà vût la sodisfazion di jessi segnalât par une sô prose inmò interessant, ma no dal sigûr de cualitât e de valence di chest sô ultin impegn. (von zercläre)

    La leç di tutele des minorancis (la L.N. 482/99) al articul 4 e sclarìs che: "Tes scuelis maternis dai cumuns interessâts a la tutele, l'educazion lenghistiche e proviôt, dongje dal ûs de lenghe italiane, ancje l'ûs de lenghe de minorance pal davuelgiment des ativitâts educativis. Tes scuelis elementârs e tes scuelis secondariis di prin grât al è proviodût l'ûs ancje de lenghe de minorance come instrument di insegnament."

    Di fat cumò tes nestris scuelis si podarès, e si dovarès, insegnâ la lenghe, la culture e la storie dal Friûl, tai fats  dut al è impen unevore plui complicât. Prin, parcè masse genitôrs di fruts furlans no son afàt persuadûts  ch'al sedi vantazôs doprâ une part dal timp scuelastics par chestis ativitâts. Secont, parcè inmò masse docents (mestris e professôrs) a considerin cheste prionte d'impegn plui un fastidi che une oportunitât. Tierç, parcè ch'al mancje un plan, un progèt, pe formazion e l'azornament  dai docents ch'a intindin impegnâsi in chest insegnament, sul esempli di ce ch'al sucêt in provincie di Bolsàn/Bozen dulà ch'al esist un Institût Pedagogic Ladin ch'al davuelç justeapont chestis funzions par ch'el che s'inten l'insegnament dal ladin tes scuelis dal oblig. E infin parcè ch'a mancjin ju imprescj didatics, ossei vocabolaris, gramadiis, antologiis e sussidiaris.

    A dî la veretât un biel libri di cheste sorte al jere stât publicât de Societât Filologjiche tal 1989, si trate de antologie pai fruts des scuelis "La Stradegnove", curade di Luzi Perès, Vitorine Carlon e Erald Sgubin, su ideazion inmò di Dino Virgili e insiorade dai dissens di Sandri Di Suald. Che dutcâs 'e à dai limits parvie che la grafie dai tescj no je stade azornade secont lis ultimis regulis de normalizazion. Alc di plui gnûf e azornât nus al propon invezit la mestre di Dartigne Luzie Vacchiano Sasso, ch'e à burît fûr un daûr chel âtris doi "libris pai fruts dai 6 ai 10 agns par ch'a imparin cun gjonde a cognossi la lenghe e la culture furlane". Il prin al à par titul "Sot l'arc di Sant Marc" (2003), il secont "Jo e il mont ator di me" (2004). Lis publicazions a son vignudis fûr in colaborazion e cul sostegn de Societât Filologjiche Furlane e de Associazion "Amîs dal teatri" di Dartigne.

    E pant la mestre Luzie, vuê in meretade pension ma simpri istès ative tal colaborâ cu la scuele tal puartâ indenant plusôrs iniziativis, che: "Chest libri al è nassût par dâ une man ai fruts, ai gjenitôrs e ai mestris par che i piçui a puedin cjapâ confidence cu la nestre culture e lenghe furlane fin dai prins agns de vite".  Cussì dentrivie i fruts e i mestris a puèdin cjatâ esemplis di leture leade a la scriture e al dissen, leturis curtis par dâ mût di lei plui di cualchi volte, il gust di capî che ogni frut al pues scrivi robis bielis e impuartantis, un invît a fâ il lavôr proponût parcè che il libri nol à di siervî dome par lei ma ancje par ativitâts di ricercje, ocasions par discori di fats e aveniments biei e bruts de vite di ogni dì, une varietât di contis, dialigs, poesiis, esperiencis, di podê sielzi secont la maduritât e competence dal frut, dal mestri e dai gjenitôrs. In sumis un imprest didatic complet e cetant util che lis scuelis de Furlanie a fasaressin ben a adotâ.

    Daspò di cheste prime pusitive esperience la mestre Luzie  'e à burît fûr daurman un secont libri sun chest stamp, cheste volte cul titul "Jo e il mont ator di me" (2004). Te sô jentrade si scrîf: Cualchidun di vuâtris al varà bielzà vût pes mans "Sot l'arc di Sant Marc" un âtri librut ch'al è plui di un silabari, ancje parcè ch'al fevele come un amì e come un amì al compagne i scuelârs dulinvie pal an di scuele. Poben, "Jo e il mont ator di me" al è un libri inmò plui biel, plui curiôs, plui amion: al spieghe i secrets e i misteris de nestre tiere dulà che ognun di nô al vîf lant a font par fîl e par segn su dutis lis storiis de nestre vite". Al merte inmò memoreât che i doi libris de mestre Luzie si zovin dai biei dissens realizâts dai fruts di scuele di Dartigne, di Laura Sasso e di Agnese Pontelli.