A son stadis organizadis chest Autun a Tumieç e in Cjargne dute une rieste di events e conferencis (e a laran indenant ancje chest an cu ven)  par memoreâ i cinccent agns de muart di Zuanfrancesc di Tumieç, un dai plui grancj pitôrs e esponents di chel grup dai "Tumiezins" che a verin in Domeni di Tumieç (Domeni Mioni -1448-1507) il lôr cjâf scuele.

    Zuanfrancesc del Zotto, che i tignive a fâsi clamâ "Zuanfrancesc di Tumieç", si scrupule che al sedi nassût ator la mitât dal Cuatricent (l'an 1451 nol è dut câs sigûr), di un ciert Odorì-Danêl di Soclêf. E se de sô produzion artistiche si à une buine documentazion, ancje par chel che al inten lis datis di riferiment, nol è cussì impen in rivuart de sô formazion e des sôs vicendis biografichis.

    Nassût, cemût che si à vût iniment, inte mitât dal secul diesim-cuint si sa par sigûr che al fo atîf in Friûl e tal Cjadovri tra il 1482 e il 1510. I critics a àn cirût intes oparis dal pitôr di Soclêf elements che a puedin colegâlu in cualchi forme aes corints artistichis talianis, vâl a dî chel a chel umanisim che al veve scomençât a cjapâ pît chenti parie cu la dominazion venite. Di chê altre bande no si stente a viodi ancje i segns di une influence de scuele gjermaniche intes pituris di Zuanfrancesc, tant che si po crodi che al vebi imparât ce che al veve di imparâ intes buteghis di paîs, dulà che si incrosavin la tradizion locâl e lis influencis sedi talianis che gjermanichis. Buteghis che par altri a vevin une lôr specifiche tradizion, baste ricuardâ artiscj tant che Nicolau Mariuç di Glemone, e dai siei fiis Zuanut e Francesc. Di un Lenart, ancje chel di Glemone, e dai fiis Zuan, Antoni e Pieri, e inmò dal udinês Domeni, clamât "lu Domine".

    Pi di mancul Zuanfrancesc di Tumieç al rive a imponisi tant che une personalitât artistiche di prin plan. Marcat graficisim, tipologjie fuarte e segnade dal vivôr espressîf des musis e de monumentalitât des figuris, il dut leât cuntune impostazion cromatiche sclete, a son particolârs che a dan la misure de grandece artistiche di chest autôr. Segns carateristics des oparis di Zuanfrancesc a son ancje une puntiliose fedeltât a la decorazion gotiche, l'ûs di incurnisâ in ros e di scurî i trats. La stesse proposizion des figuris des sôs oparis, tant che il demoni che al ven presentât secont i modei de Europe disore, e ciertis altris composizions che lu svicinin invezit ai artiscj di scuele carintiane, a lassin intindi che al vebi vût contats significants cu lis scuelis di Villach e di Sant Veit su la Glan. Cence dut câs dismenteâ la presince in Furlanie, tal timp che Zuanfrancesc al jere zovin, di artiscj innomenâts di scuele todescje come Lenart Thanner, Zorç Perschon e Albert Todesc.

    Che si sepi, la prime vore che e je opare sigure di Zuanfrancesc e puarte la date dal 1482. Si trate dai afrescs fats sore la façade de glesie di Vivâr, che par altri a son lâts pierdûts cuant che tal 1820 la glesie stesse e je stade ingrandide. Altris oparis dal pitôr cjargnel si cjatilis inte glesie di San Nicolau dal Cumieli, dulà che al decorà il coro. De man di Zuanfrancesc a risultin jessi ancje i afrescs che si cjatin tal presbiteri de glesie di Sant Antoni di Barbean, ret Spilimberc. Tal 1493 invezit al decorà la glesie dal so paîs, o sei la plêf di San Martin di Soclêf.

    Dut câs la vore maestre di Zuanfrancesc a son i afrescs fats tal 1496 inte glesie di Provesan. Cheste opare si cualifiche soredut pe grande Crocifission che e cjape dentri, dut interie, une parêt di font. Achì il pitôr si è in plen bandonat ae foghe de sô ispirazion, sfidant ancje la critiche dal so timp cun coragjosis libertâts, che a atestin in lui la cjapade di cussience di une totâl paronance dai propis mieçs, la malevoie a cjalâ viers Vignesie, la volude ignorance di ce che in chel timp a stavin realizant Piligrin di San Denêl o Zuan Martini, di pôc plui zovins di lui. Cundut achel al semee che a Provesan al vebi esprimût il so massim sfuarç creatîf e otignût i risultâts plui alts, e che indi sedi restât esaurît.

    Plui indenant al al operà inte glesie di Sante Marie di Cordenons. E inmò tal an 1500 in chê di San Florean di For di Sore, e tal 1504 in chê di San Laurinç di For di Sot. Tal realizâ i afrescs de glesie di San Laurinç al vignì judât dal zovin Zuan Antoni di Pordenon, che al deventarà po lui stes un grant artist, e il risultât de opare al torne a jessi di grant efiet.

    Oltri ai afrescs, Zuanfrancesc nus lassât dome dôs temparis di secondarie impuartance: une piçule Madone che cumò si po viodile inte Galarie de Academie di Vignesie e la pale di San Martin inte za vude iniment glesie di Soclêf. Di une pale di altâr pe confraternite di San Lenart di Glemone o cjatin un riferiment intun contrat dal 1510, ma no risulte nissune memorie che la opare e sedi stade po realizade, e l'impegn di piturâle, cjolt sù di Zuanfrancesc, al è il so ultin at restât intai documents. Al è muart juste apont tal 1510.

    Il timp di Zuanfrancesc di Tumieç al è il timp che la dominazion di Vignesie, daspò la concuiste cu lis armis de nestre Patrie tal 1420, e le biel planc consolidantsi. Chest al puartà dai cambiament in ducj i setôrs, e naturalmentri ancje in chel artistic. Cussì a traviers Vignesie l'Umanisim talian al rivà ancje chenti, a partî dal Cuatricent, produsint une floridure di cultôrs nostrans par chel che al inten lis letaris, soredut tra la nobiltât. Mentri intes arts figurativis, restadis domini des classis plui popolârs, l'inest talian inte tradizion locâl, restade gotiche in maniere ostinade, al de vite a une origjinâl, e cetant interessant, produzion regjonâl, cun maestris di grant nivel, massime par chel che al inten la sculture dal len. E di cheste ostinade resistence culturâl inmò vuê in Cjargne o vin des significativis testemoneancis.

    A Voaltris e aes vuestris fameis i auguris plui sclets di Bon Nadâl e di buinis fiestis. (renzo balzan)