La crisi economiche che e à interessât in maniere pesant ancje il Friûl no je finide, ma diviers a son i segnâi positîfs par un gnûf senari dal 2011. I principâi analiscj economics sun chest cont a sotliniin cemût che il 2011 al viodarà la Europe impegnade a evitâ pausis des sôs economiis nazionâls, pluitost che impegnade a restâ al pas dai Stâts Unîts e di chês altris economiis emergjents, in particolâr Russie, Brasîl, Indie e Cine. In chest contest lis previsions relativis ae Italie la viodin inmò indaûr (cuntune incressite dal Pil ator dal 1,1%) no dome rispiet ae Gjermanie (la plui vivarose e economichementri salde dai stâts europeans) ma ancje ae medie di chei altri Paîs de Union.

    Di front a chest contest trê a son i fronts sui cuâi lis impresis furlanis a varan a agjî mediant lis lôr strategjis di curt tiermin e i lôr programs di svilup plurienâl: "inovazion, internazionalizazion e agregazion". Inovazion sevi tecniche che organizative des produzions, sevi intai servizis; internazionalizazion tal sens slargjât de peraule che e comprendi aduncje, parie cul l'export, ancje la creazions di presidis comerciâi organizât; agregazion tra impresis indreçade ae soluzion de problematiche de "sot-dimension" des impresis di chenti intun contest di competizion globâl.

    O vin dite di segnâi positîfs, e tra chescj e va segnalade la realtât de aree industriâl logade a cjaval dai comuns di Sedean e di Codroip, o sei "Prâts di Lorêt" cu lis sôs 500 ativitâts presints intai setôrs de industrie, dal artesanât, dal cumierç, de agriculture e dai servizis, par un totâl di uns 800 dipendents, che a divegnin ducj dai comuns dai contors. Buinis notiziis a son ancje chês che a rivin di Tumieç, dulà che il sindacât al à vût mût di sotliniâ che la situazion ae "Automotive Lighting", la fabriche che e prodûs fanâi pes autos des maiôrs marcjis presints sul marcjât, e che e je la plui impuartant realtât ocupazionâl de zone, e je tornade buine e che a 'nd è bielzà ordinazions par almancul doi agns.

    Impuartant al è ancje cemût che e sta lant indenant la vicende de "ex Caffaro" a Tor di Zuin. Daspò doi agns une vore dificii, tra sperancis e delusions, la Caffaro e à podût finalmentri voltâ pagjine cu la firme dal acuardi sindacâl tra la gnove propietât, la Newco 5 srl dal Grup Bertolini, e lis rapresentancis sindacâls. L'acuardi juste apont, firmât inte sede de Confindustrie di Udin, al proviôt il mantigniment di 135 lavoradôrs, plui altris 5 cuant a vignaran inviâts i gnûfs implants, mentri chei altris a restaran in casse integrazion par altris 18 mês. Di sotliniât inmò che la gnove propietât e fâs cont di meti in vore, dentri cinc agns, 30 milions di euros pe costruzion di un gnûf implant di clôr sode.

    Di Tavagnà e diven impen la notizie che la Pilosio e à cuistât une gnove impuartant comesse. In fats par mandâ in orbite i propis satelits la agjenzie spaziâl russe Ruscomos e à sielzût di utilizâ une tor mobil pal rifurniment progjetade e realizade de Lama di Quinto, aziende che e prodûs armaduris lizeris, colegade ae Pilosio. "Cheste   comesse  e  da  di  viodi che la strategjie dal nestri grup e je induvinade, co   la   stin fondant   su   la   internazionalizazion - al

displee Dario Roustayan - maiorent de Pilosio. Vê completade la acuisizion de Lama di Quinto al è un pas che al à segnât une tape fondamentâl pal rilanç de societât, graziis ae buine posizion che o vin cuistade sui marcjâts e ae cualitât dai prodots che o stin realizant".

    Bielis gnovis ancje di Buri dulà che il grup Danieli al à rispietât lis previsions sierant il secont semestri dal 2010 cuntune incressite di rigjâfs e di util. Di Jugn a Dicembar lis açaiariis di Buri a àn fat regjistrâ rigjâfs pari a 1,4 miliarts di euros, in aument dal 33% rispiet ae stesse dade dal esercizi precedent. Inmò ducj i indicadôrs de situazion finanziarie a son positîfs, e pal 2011 si stime une prionte di incressite de produzion. Dut câs a dâ di fastidiâ su la tignude di cheste riprese al è ce che al sta sucedint in Libie e intal Medi Orient, dulà che la Danieli e à tradizionalmentri des presincis, e des comessis, une vore significants.

    Gnovis mancul bielis a divegnin invezit di Purcie (Pordenon) dulà che la Electrolux,  o sei la grande aziende multinazionâl che e prodûs frigorifars e machinis par lavâ, e à decidût di taiâ in maniere pesant il numar dai ocupâts. In fats il gnûf plan industriâl al proviôt un tai di 210 adets tal stabiliment di Purcie, ma a chescj si à di zontâ altris 200 puescj in mancul che a jerin stât taiâts cul plan dal 2008 e che inmò a àn di jessi. Naturalmentri la mobilitazion par salvâ chescj puescj di vore e je grande, ma e sarà dabon dure rivâ a fai cambiâ opinion ae direzion de aziende, co il marcjât al stente une vore assorbî la produzion.

    Intant al continue il calvari dai dipendents de Safilo di Martignà. Cussì di resint a Rome al è stât cjatât un acuardi par altris 24 mês di casse integrazion straordenarie pai 856 lavoradôrs. Di bon al è che la fabriche di Martignà, daspò un procès di riorganizazion che si è daûr a mandâ  indenant, e deventarà un centri di rifinidure dai ocjâi, cul implei di circje 300 adets. Casse integrazion ancje par 33 operaris de Weissenfels Traction di Fusinis di Tarvis. Il proviodiment al durarà fintremai al mês di Otubar cu ven, e al diven di un moment dificil de aziende pe mancjance di comessis. Dificoltâts si stan palesant ancje a Dimpeç, dulà che e riscje di sospendi la produzion la Metal-box che e da lavôr a 45 operaris. In chest câs no centre la mancjance di comessis, ma une gjestion finanziarie pôc prevident. Di cheste situazion si stant interessant i sindacâts e i sindics di Dimpeç e di Soclêf, dulà che a loghin la plui part dai lavoradôrs.

    In conclusion o podìn dî che si è in presince di plui segnâi positîf pe economie furlane, ma a 'nd è inmò dai ponts di crisi di no trascurâ. E cumò, cemût che si à vût iniment denant trat, e je vignude purpûr a zontâsi la situazion une vore imberdeade, anzit incandessent par tancj aspiets, inte Afriche disore e tal Medi Orient, cun svilups che al è dificil di podê  proviodi, e che par cumò a stan puartant a une incressite dai presis des materiis primis e soredut dai carburants, ducj i doi fatôrs che a alcin i coscj di produzion des nestris aziendis. Cundut achel sperin istès ben. Bon 3 di Avrîl a ducj Voaltris!(renzo balzan)

La tiere e je une grande ricjece dal Friûl
e no po jessi strassade pai comuts di chei altris!