Udin - Ce fin aial fat il moviment autonomist furlan? Dulà sono lâts a finîle i autonomiscj? Valie inmò la pene di spindisi par rivâ a otignî un Friûl dulà che i furlans a decidin, di bessôi, dal propi destin? Domandis chestis cence altri di atualitât co mai come in chescj moments il dibatiment sun chescj proposit al è lât al mancul. Cundut achel une rispueste al à cirût di dâle Walter Tomada, cuntun interessant articul che al è vignût fûr sul setemanâl “Il Friuli” dai 19 di Fevrâr stât. Tomada al è stât un colaboradôr  dal za sindic di Udin, Sergjo Cecot, che tantis sperancis al veve inviulât tra i furlaniscj, e partant al cognòs benon l’argoment che al trate. Nus è semeât interessant tornâ a proponilu par furlan: il test origjinâl par talian al è stât voltat par cure de nestre redazion.

Cui che di chescj timps si supe la tumiant publicitât dai “Visitors” sui scherms des rêts di Mediaset si sarà impensât di une des plui induvinadis intuizions politichis di Sergjo Cecot, l’ultin dai furlaniscj: un che al fo bon cu la sô “baronade verbâl” di fluscâ fintremai la vignude jù sul Cjistiel di Udin dal cuadrunvirât Berlusconi-Fini-Bossi-Follini clamant i principâi menadôrs dai partîts di guviers come lis “creaturis” alienis che a vignivin a colonizâ la capitâl dal Friûl.

    Vuê di front ae vignude dai “Visitors” romans i furlans si cjataressin di bessôi e bandonâts. No ur restarès  che contâ rivilîts ai fiis une liende rassegnade dal titul “Al jere une volte l’autonomisim”, ricuart di une stagjon dulà che la peraule “Friûl” e jere al ordin dal dì de agjende politiche. E cumò, ce mai isal sucedût? Un marzian che al rivàs une altre volte in Friûl, daspò vê metût chenti il so pît za fa dîs agns indaûr, al pensarès di vê sbaliât planet. Dal 1998, dade dulà che e scomençà la “Vierte autonomiste”, screade di Cecot cu la concuiste dal Comun di Udin a discapit dal centri-diestre e dal centri-çampe, a son passadis pôc plui di dôs legjislaturis ma la “cuestion furlane” e je semplicementri disparide dal dibatiment co i schiriaments in cjamp a àn dispostât la lôr atenzion su altris temis.

    Cemût isal stât pussibil un tant? Ise stade vere glorie? A son, chestis, domandis che a burissin fûr scletis, ma che a cjatin rispuestis claris a traviers une elementâr analisi de storie politiche furlane (dal Moviment pe Autonomie dal imediât daspò-vuere aes gloriis dal Moviment Friûl) ma ancje intun esam de realtât di fat de situazion socilinguistiche di cjase nestre: plui de mitât des fameis, par esempli, si ricognossin come furlanis domandant l’insegnament de marilenghe a scuele pai lôr fiis. La storie e il presint nus mostrin aduncje in maniere palês la esistence di un sintiment latent che, cun dute probabilitât, vignûts a mancjâ i siei puarte bandiere di une stagjon une vore vivarose, vuê nol rive plui a cjatâ gnûfs interpretis.

    La stagjon di Cecot, di Marzi Strassolt, di Alessandre Guerra e je finide  cence lassâ erêts. Chei che za fa doi agns a àn cjapade la volte al sindic di Udin e al president de Provincie sun chês dôs poltronis a àn finît par lâ dilunc par altris stradis. Furio Honsell, che purpûr cul fortunât sproc “Yes si pues” al veve dât sperancis ai partidants de furlanetât, al à finît par spindisi par altris causis (pacifisim, pluriculturalisim)  ma  nol  da di viodi di vê l’autonomisim come prioritât.

    Pieri Fontanin, che pûr vulintîr al cjaparès su di se la funzion di pont di riferiment autonomist, al mostre dut câs di ocupâsi des rivendicazions sul furlan plui come segretari de Leghe intenzionât a fâ i conts cul Udc che come vêr interprete di un autentiche dibisugne de coletivitât. La passion di Fontanin pal Friûl e la sô identitât no si la discut, ma nol semee che al rivi a tirâsi daûr la sô maiorance sun chest teren. Ni lui ni la Leghe, che in regjon si fasin cetant sintî, al semee che a vebin vût cûr di oponisi ai tais mastins che a son stâts fats ae leç pe tutele des lenghis minoritariis dal guvier nazionâl, guvier dulà che, fint a prove contrarie, a son presint in maniere autorevul e determinat.

    In sumis, “i partidants de acuile” si sintin un pôc vuarfins daspò che il “sindic” al è tornât fisiche, e daspò lis pôc gloriosis vicendis dal nobil ex retôr e il passaç de Guerra al Pd, dulà che Alessandre e à - a dî la veretât - tornat a scomençâ la traine partint de gavete, acolzude par altri cence grancj slançs. Al semee che une ete e sedi pardabon rivade al so amont: tant plui che no si trate dome di nons. Ce che al mancje e je une vision politiche che e torni a puartâ la identitât comunitât-teritori al centri dal confront soci-politic e culturâl, dant a chest binomi une interpretazion di viertidure al futûr e no di regression al passât o ben il lâ a sierâsi intune cente in se stes.

    Purpûr il spazi al è: e l’interès a ocupâlu de bande di sogjets atîfs ancje. Al è cussì che ae resinte cunvigne di Aleance pe Italie cun Bruno Tabacci nol è mancjat de bande dal referent regjonâl dal moviment, Enrico Bertossi, un riclam al post- autonomisim cecotian come fatôr ispiradôr de azion di un “rasseblement” moderât che al smiri ae “filosofie dal fâ”. Chest riclam al podarès semeâ paradossâl, viodût che, di assessôr regjonâl, Bertossi al movè plui di cualchi critiche al sindic Cecot. Cundut achel, a ben viodi, cui che al cîr jentrâ tal cuadri politic lu fâs sfrutant i spazis davierts e in chest câs Bertossi e i siei a smiris a lâ a jemplâ ancje chest vueit.

    Dome il timp al disarà se chest tentatîf al varà plui glorie di altris “tierçs poi” nassût intai agns passâts fra grancj sunsûrs e po disparîts intune batude di voli. Al podarès ancje fâsi indenant al orizont cualchi gnûf Fausto Schiavi che inmò no viodin: ma il disingjan e l’aviliment in cui che al veve crodût che chê “Vierte” e ves podût durâ a son par cumò palês, parie ae sensazion che di “autonomie” nissun nol fevelarà plui, almancul fintremai che no sarìn tornâts sot votazions. (walter tomada)