Sauris/Zahre - Inmò an passât al è vignût fûr un libri cetant interessant sul cont de toponomastiche di Sauris/Zahre, un lûc dulà che e vîf une comunitât di antighe divignince todescje. Il titul de opare al è: “La toponomastica di Sauris - Un’isola tedescofona in terra di Carnia” (pp.306). Le à curade la dotore Barbara Cinausero, che si è zovade de colaborazion di Ermanno Dentesano, biel che i editôrs a son la societât Filologjiche e il comun di Sauris.

    Il comun di Sauris/Zahre al è logât inte alte Cjargne, su lis clevis a çampe dal riul Lumiei, disponût tra i 950 metris sul nivel dal mâr de frazion di “La Maine” e i 1400 metris di Sauris di Sore/Oubrzahre. Framieç si cjatin Sauris di Sot/Untrzahre, sede dal comun, e Lateis/Latais, logât suntun splaç parsore vie il lât artificiâl creât, sul scomençâ dai agns cincuante dal secul passât, par fâ funzionâ lis centrâls idroeletrichis di Dimpeç e Somplât. In dì di vuê i siei abitants a son circje 450.

    Intes cuatri frazions si Sauris si fevele cu la midiesime facilitât il talian, il furlan e la marilenghe locâl di divignince todescje (zarischen sprache). Anzit, ce che al maravee il forest al è il passâ dai saurans dal todesc al furlan (cjargnel), o ben dal talian al todesc, cence une reson aparint, o magari cence nancje inacuarzisi dal salt linguistic.

    L’incendi, che tal 1758 al parà in cinise l’archivi parochiâl di Sauris di Sore, al fasè pierdi par simpri une ricje rieste di documents rivuardants lis origjinis de comunitât saurane. Cussì a son pôcs i documents restats, e pe plui part riprodusûts in copie in ete plui resinte. Il plui antîcs di chescj ats, un datât 1280 e chel altri 1306, si ju cjate intes “Notizie storiche della Carnia” (Tumieç, 1928) dal storic Pius Paschini. Tal prin si ricuarde che un Averart di Soclêf al ricognòs di vê un feut de Glesie di Aquilee, “in contratta de Sauris”. Tal secont document, chel dal 1306, un Niculau Adraborêt di Sauris al ve dal Patriarcje di Aquilee la investidure di un mâs in “villa de Plazas, il loco qui dicitur Sauras”.

    Altris documents di date posteriôr a vignirin riprodusûts in estrat di pre Luîs Lucchini (“Memorie del santuario di S. Osvaldo in Sauris” - Udin, 1880). Il plui antîc di chescj, che al puarte la date dal 1328, al pant che a chel timp a esistevin inte alte Val dal Lumiei dôs glesiis: une dedicade a San Svualt (Sauris di Sot) e une altre a San Laurinç (Sauris di Sore).

    Si po scrupulâ che la vignude dai prins abitants di origjin todescje inte Val dal Lumiei si la ve ae fin dal secul diesim-secont. Une tradizion popolâr e pant che doi soldâts (o cjaçadôrs), dispatriâts de Gjermanie a vignirin a lozâ in chescj sîts torcenâts di altis monts par sfrancjâsi di un passât di vuere e di strussiis. Naturalmentri si trate di une liende che no à nissun leam cu la realtât storiche.

    Sigûr al è invezit che i prins abitants todescs a vevin di jessi un piçul grop. Di fat se si va a scrutinâ i libris dai batisims e dai maridâts inte parochie di Sauris, che a scomencin tal an istès dal incendi vût iniment denant trat, si cjate nome sîs nons di palês divignince todescje: Bolf, Minigher, Plotzer, Schneider, Tolar e Troyer.

    Lis primis fameis todescjis che a vignirin a logâ a Zahre a varessin di jessi stadis chês dai Plotzer a Sauris di Sore, dai Schneider inte frazion di Sauris di Sot, e dai Troyer vadì a La Maine, dulà che inmò in dì di vuê si cjate chest cognon. A sapontin chestis suposizions la esistence inte Val di Lesach (Carintie) di un pôcs di chescj cognons saurans. Par esempli i Platzer si ju cjate a Tessenberg, no lontan di Kartisch, chel dai Schneider al è comun a Tilliach, e chel dai Troyer si lu cjate a S. Lorenz.

    Dut câs dongje di chescj cognons di origjin todescje, intai regjistris parochiâi si cjatin ancje cognons di divignince romanze ( o sei cjargnele) come Lucchini, Somvilla, Petris o De Petris, Polentarutti e Domini, a Sauris di Sore. E inmò Colle, De Colle, Somvilla, Lucchini e Domini a Lateis. Altris cognons tant che De Sabbata, Casanova e Candotti, a rivuardin fameis imigradis a Sauris daspò la seconde mitât dal 1700.

    Cheste particolâr presince di cognons (e sorenons) todesc e romançs a Sauris/Zahre, e propon la domande se i colonizadôrs todescs, cuant che a vignirin a logâ in cheste Val, a cjatarin bielzà, in part o ben su dut il teritori, une popolazion origjinarie di etnie romanze. Scrutinant i toponims e la lôr presince intai tiermins dal teritori comunâl, juste cul jutori de opare di Barbara Cinausero o podìn cirî di dâ une rispueste a cheste domande. In fats, i pôcs toponims che no son di divignince todescje tant che Malins, Lumiei, Torondon, Novarzuta e Festons, e cualchi altri inmò, si riferissin a sîts e riui che a son ducj logâts ai confins dal teritori sauran e che a forin cedûts probabilmentri des popolazions daprûf pal ûs dal monteâ. Dentri vie dal teritori sauran, scuasit ducj i toponims a son di origjin alte-todescje e se si scuintrin, in cheste cente, cierts nons di lûc romançs, tant che La Maine, Costalte, Cjasenove o ben La Stua, chescj a rapresentin cence altris denominazions resintis o ben traduzions di toponims origjinaris todescs.

    Il non todesc di “Sauris” inte bocje dai saurans al sune “de Tsare”. La vôs primitive “Sauris” o “Saures” e je stade dade des popolazions dacîs de Val Tiliment che, par nomenâ la posizion adalt de concje dal Lumiei, la clamarin “Sôre”. Di achì aduncje a divignirin po dopo “Sauras” e “Saures”. Cuant che a rivarin i colonizadôrs todescs l’origjinari “Sauras”, si tramudà inte lôr bocje in “Sâre” e po in “Tsare”, che e je la denominazion di dute la valade.

    E esist dut câs une altre suposizion su la origjin de denominazion di “Tsare”, che vadì si sedi formade dal antîc alt todesc “Zähre”, vôs poetiche che e vûl dî lagrime, e che e podarès jessi stade doprade dai prins colonizadôrs saurans par descrivi la vite une vore dure e fadiose che a jerin obleâts a frontâ. In chest câs la Val interie e cuistarès la denominazion di Zährntol”, o sei Val des lagrimis. In sumis chel di Barbara Cinausero al è un lavôr cetant interessant, une opare che e po dabon zovâ ae comunitât saurane a salvâ lis testemoneancis plui significativis de sô identitât.  (vz)