Deventât provisoriementri imperadôr Berengari dal 915, lui no si dè nissun pinsîr dal Friûl e lu lassà in man a siei partesans, bogns di nuie, che plui tart lu tradirin, ma che a lassarin cori pe nestre tiere mandriis di Ongjars, ogni volte che ur saltà il gri di vignî.

    No si sa un dret cetantis voltis che chescj cjastics di Diu si strucjarin ca in Friûl: al semee che a usassin spietâ, tra une incursion e chê altre, il timp che al bastave parcè che la int ur ves preparât alc altri di robâ. A vignivin pe solite strade di soreli jevât; a passavin fûr par mieç de Basse, dulà che e je inmò la Stradalte che, daspò di chê volte, e fo clamade Ongjaresche e dute la campagne disore e disot par un gran toc e cjapà il non di “vastata Ungarorum”. Ma si pò crodi che dute la planure furlane e sei stade, ce pôc ce trop, dispueade e spopolade di chês sbilfis e che mai, in tancj secui di invasions e devastazions che a sopressarin il Friûl - nancje cun Atile - la nestre regjon no vebi presentât un spetacul di desolazion compagn. Si podarès, tant che si vûl, dividi la storie furlane in dôs parts; prime dai Ongjars e daspò dai Ongjars, parcè che, di dut ce che al jere stât fat prime, nol restà altri che i vanzums za sapulîts sot tiere, che i Ongjars no vevin timp di lâ a sgjavâ.

    E fo une fortune pai paîs e pe int de Alte, di cjatâsi a jessi puars e fûr di man: cussì a forin sparagnâts ancje di cheste disgracie, midiant che i invasôrs no vevin timp di pierdi dulà che al jere pôc ce robâ e i parons a podevin resisti.

    Dome su la mitât di chel secul l'imperadôr Oton al rivà adore di rompi lis cuestis ai Ongjars e di fermâ la tragjiche usance che a vevin cjapade.

Daspò de tampieste dai Ongjars il Friûl, dibot par cinc secui, al reste distacât dal ambient talian e al va a fâ part dal ream gjermanic. Si capìs che restant gjeografichementri di ca des monts, al restà ancje leât cul mont culturâl latin plui che no lis regjons di là de Donau, ma la sô vite politiche e fo chê di un stât feudâl todesc.

    Cheste situazion e scomence a formâsi sot dal imperadôr Oton I. Il marchesât furlan, ridusût in maseriis e unît cu la marcje di Verone, al passe intes mans di Indrì di Baviere; e po il ducât de Carintie, cul Cragn, il Staiar, l'Istrie e il Friûl, al ven distacât de Baviere. Cussì l'Herzog di Carintie, al comande ancje de marcje veronese e de Furlanie, indulà che al comparìs, si e no, cualchi volte un cont che nol conte nuie. Chel che al conte simpri plui devant dal imperadôr al è il patriarcje di Aquilee.

Al veve za tacât Berengari a fâ cualchi donazion di terens al patriarcje Fidrì (900/904); ma la prime investidure di une cierte impuartance e fo chê dal imperadôr Oton I, che dal 967 al meteve intes mans dal patriarcje Rodualt dut il teritori furlan tra la Stradalte e il mâr, di Cervignan fintremai ae Livence, cence contâ altris concessions ca e là. Une vore di donazions di terens e paîs al fasè ancje Oton II, tant a Rodualt che a Zuan, e inmò di plui Oton III, massime des bandis di Pleç, Tolmin, Gurize e sul Vipau.

    Al ven a jessi che, intor dal an 1000, la jurisdizion dal Cont dal Friûl e jere dute semenade di possessions dal patriarcje e chestis a deventarin simpri plui largjis e numerosis, in maniere che la paronance dal cont, prime rote da tantis isulis di domini patriarcjâl, e finì, un pôc a la volte, cul ridusisi in cualchi isule pierdude tal teritori dipendent dal patriarcje. Si sa che cheste e fo pardut la politiche dai trê Otons: meti lis jurisdizions feudâls intes mans di umigns de Glesie par no che deventassin ereditariis intes fameis dai conts e par podê tignî leâts cun cheste cjavece vescui e abâts.

    In chest timp une largje fasse di teritori disore e disot de Stradalte e scomence a popolâsi di paisuts che a an un non sclâf: Guriç, Guricize, Gradiscje, Gradiscjute, Rividiscje, Stracis, Bielgrât, Sante Marize, Sante Mariçute, Vuirc, Listize, Çumpicje, Sclaunic, Samardencje e vie indenant. Cheste e jere la part de Furlanie che e veve patît di plui par vie dai Ongjars: si viôt che in chei sîts al veve di sei restât dibot un desert e che i Sclâfs des monts a soreli jevât, o invidâts, o lassâts vignî dai patriarcjis, a capitarin a tornâju a popolâ. E chescj paîs, par ordin che a nassevin, a passavin sot la jurisdizion dai stes patriarcjis (diplome di Oton III al patriarcje Zuan, 1001).

    Fintremai al timp dal patriarcje Popon no si pò dî cun sigurece di ce nature e cun ce estension che e fos cheste jurisdizion: se al cont al restàs inmò cualchi dirit o nuie. Ma cun Popon (1019 - 1042) la cuestion si definìs, parcè che dal 1027 l'imperadôr Conrât II al declarà che i paîs, i cjistiei, i terens, e lis personis che a jerin sot dal patriarcje no dipendevin in nissune maniere ni da conts, ni da marchês, ni da funzionaris imperiâi: al ven a jessi che il Patriarcje al jere feudatari di prin grât, dipindint nome e diretementri dal Imperadôr; cun di plui il stes Conrât al dave a Popon il dirit di bati monede, che al vignive a significâ une vere sovranitât. Cussì si pò dî che il principât temporâl dai patriarcjis di Aquilee al jere nassût.
(josef marchet - da “Cuintristorie dal Friûl”)

Avrîl - Primevere sporcje: Jenfri i bùtui d'une cise,/ quan'ch'al è niulât il cîl,/ su pai mûrs di piere grise/ duc' strafonz 'ta ploe d'avrîl,/ un lacài a si strissine/ cence fâ nissun rumôr;/ al cjamine, nol cjamine,/ ma i voglàz ju gire atôr./ Lant a violis, fantazzute,/ s'i tu viôz alc di lusìnt,/ no tocjâ cu la manute:/ al è snachi e al pâr arint!/ Chest rizzòt di frute bionde,/ sul ramac' dongje une rose,/ cheste cjòssule taronde/ cu la cotule vistose,/ ce ae di jessi? File in presse,/ moscardìn, no son afârs…/ No la viostu? A è 'ne caesse:/ un sbladàc e un pâr di cuârs!  (Pre Bepo Marchet - dal Lunari Parochiâl di Glemone pal 1945)

Chestis che o vìn proponût denant trat a son peraulis scritis di Agnul M. Pitane (Agnul di Spere) tal 1983, e cjapadis dentri inte presentazion dal prin numar de riviste “Gnovis Pagjinis Furlanis”, a pene fondade parie cun Nin Rodâr e Renzo Balzan. Agnul, che al è vignût a mancjâ a l'improvise ai 11 di zenâr dal passât 2005, di cheste publicazion al è stât l'anime e il curadôr fintremai intai ultins moments de sô esistence. Un lavôr impuartant, anzit fondamentâl, il so parcè che parie a puartâ indenant la riviste al è stât par scuasit vincj agns ancje dean de Union Scritôr Furlans, istituzion ancje cheste pensade e fondade di lui, si ben che inta chei agns al logàs e al lavoràs inmò in Svuizare. Che Agnul al sedi stât un om esemplâr e un furlan sclet come pôs, lu vìn viodût ai 11 di zenâr stât cuant che inte sale dal Consei de Cjase de Comune di Codroip, un grant numar di personis a jerin presint, denant trat par memoreâ il prin inovâl de sô muart, e po par assisti ae presentazion dal ultin numar (il XXIII) propit di Gnovis Pagjinis, che nol podeve no jessi dedicât soredut lui, a scomençâ de cuviertine.

    Di Agnul, dal so profîl di om, di poete e di scritôr, di animadôr culturâl, a àn scrit inte riviste il diretôr Renzo Balzan, il critic leterari Mario Turello, bons. Duili Cuargnâl, che tant che diretôr de “La Vite Catoliche” al à publicâts cetancj intervents e articui di Pitane, e po inmò Zuan Laurin Nardin, che al à scrutinât une des sôs maiôrs oparis poetichis, la racuelte di lirichis titulade “Chês flamis”, vignude fûr tal 1988 pes edizion Casagrande di Bellinzona. Significants massime lis peraulis dopradis di Mario Turello, che al à definît Agnul di Spere “Furlan e citadin dal mont, che al saveve cjalâ cun avuâl frescjece e cu la stesse emozion a chei altris paîs come al so: investint chei di amôr, chest di rinovade maravee”. Mentri Duili Cuargnâl  al à sotliniât che: “Altris a disaran dut ce che al à fat Agnul e il tant che al à scrit. Nô achì, si contentìn di ricuardâlu tant che confradi di tantis bataiis in pro dal Friûl, de sô memorie e dal so avignî. Dôs cjossis nus vegnin iniment di lui: la sô modernitât inte sô passion pe culture furlane, une culture vierte ae ricercje di dutis lis culturis, e la sô religjositât, ben plantade e par chel cence pôre di confrontâle cui intrics dal mont di vuê”.