(Il document al ven indenant dal numar di març)

  
 La discomposizion dal Friûl. Denant dal 1963, no'nd'jere dubis di sorte su ce che al fos il Friûl: il teritori tra la linie des crestis des Alps Cjargnelis e il mâr, tra la Livence e il Lusinç (o Timâf), coincidint scuasit integralmentri cu la Provincie di Udin e buine part di chê di Gurize. Di cheste tiere nissun al meteve in dubi l'unitât in cutuardis secui di storie (dal Ducât langobart al Stât Patriarcjâl a la Patrie dal Friûl dentri la republiche venite). Come in ogni organisim storic gjeografic, ancje achì and'jere cualchi zone di inciertece e di miscliç sui ôrs.

    Tal 2004, o viodìn che la nozion di Friûl e je contestade di dutis lis bandis. Gurize e inglorie la sô gjulianitât. Pordenon la sô vignesitât. Si confont, par malicie o par ignorance, il jessi furlan cul fevelâ furlan. Cui che al olse fevelâ di "Friûl storic" al è acusât di volê risurî fantasimis de ete di mieç, e di rapresentâ nujâtri che “l'imperialisim” udinês. Di Cervignan dal Friûl a divegnin i plui dûrs refûts dal Friûl. Cui che si pant furlanist al sabore, in maniere automatiche, l'acuse di jessi sierât, egoist, razist, cjampanilist, reazionari e cussì dilunc. Si amet dai plui l'esistence di une culture, lenghe e identitât furlane; ma se si sotlinie il caratar diviersificât, variabil, policentric, daviert, e dutcâs residuâl rispiet ai grancj temis de vite dal dì di vuê. La peraule Friûl e je riferide dome aes vieris tradizions, folclôr e sagris enogastronomichis. Su la cjarte gjeografiche, tal mieç di chest teritori a cjatin larc spazi  lis peraulis Vignesie Julie (Friûl al sta scrit adalt, des bandis di Glemone). A son vignudis su aromai scuasit dôs gjenerazions che a àn simpri sintût a fevelâ dibot dome di Friûlvignesiejulie.

    Critiche de ideologjie unitariste. La dissipazion de idee di  Friûl no je opare dal câs, ni de necessitât storiche; ma, in maniere decisive ancje se no uniche, di uns cuarant'agns di strategjie smirade ae costruzion de unitât regjonâl e ae dominazion, dentrivie, de sô capitâl. Chei pôs (come Tessitori e Barbina) che tal 1947 e tal 1962 si jerin oponûts ae union sfuarçade tra doi sogjets cussì diviers a vevin viodût just: il maridaç, cun Triest paron di cjase, al sarès stât deleteri pal Friûl.

    L'ideologjie unitariste e je stade struturade seont un ciert numar di dogmis. I principâi a son: il dogme etic-politic de inmoralitât de disseparazion (bisugne unî e no dividi); il dogme culturâl dal cjampanilisim furlan (ogni rivendicazion di autonomisim e identitât, ogni difese dai interès dal Friûl al è particolarisim, un sierâsi cence costrut e v.i.); il dogme politic-economic dal volum critic e de dimension minime (plui grancj e unîts si è, plui si è fuarts e curients); il dogme economicistic de complementarietât tra la cunumie triestine e chê furlane; il dogme politic dai oblics divignìnts dal difûr (l'unitât e je imponude des circustancis internazionâls e de volontât di Rome). Cheste ideologjie e à aromai slargjât une cuzine di plomp - cabie di açâr, par doprâ un'âtre metafure ben cognossude ai sociolics - su lis ments e su lis cussiencis di cheste regjon, e discomponile toc par toc  al domandarès un impegnatîf aparât di resonaments, che nol è pussibil svilupâ in cheste sede. Si cirarà di fâlu in âtris. Pal moment o scugnìn limitâsi a une sintese conclusive: a son dutis bufulis. Di vêr al è dome che, daspò cuarant'agns di tempelament de bande dal podê regjonâl, la int le à acetade. E al à cjapât pît il principi de “cjosse fate cjâf e à” de conservazion dal esistint, dal fastidi tal viodi che al ven rimetût in discussion l'implant politic-aministratîf che, in gjenerâl, a la int no j interesse gran.

     La fuarce di Triest e la debulece dal Friûl. Il sogjet plui atîf inte elaborazion e impostazion de ideologjie e je stade, par resons palês, la congregazion sorestante triestine. In plui, simpri la stesse clape e veve fintremai de nassince de Regjon la dibisugne vitâl di parâ in fruçons il bloc furlan, che al rapresentave circje i doi tierçs o trê cuarts dal consei regjonâl. Cui che al scrîf al à sintût cu lis sôs vorelis, da impuartants rapresentants de triestinitât che a la vût la cumbinazion di frecuentâ dilunc i scuasit vincj agns (1968-1987) di lavôr di chês bandis. Cheste smire e je stade seondade inte maniere plui classiche, cun tune manovre a tanaie. Si è lavorât sul flanc di drete, a Gurize, inviulanle a bati cul cantin de sô "gjulianitât"; e sore il dut su chel di çampe, a Pordenon. Sigûr lis aspirazions di Pordenon a deventâ capolûc di provincie a jerin di viere date e ancje fondadis; ma o crodìn che se si làs a studiâ la vere storie di chê vicende, si cjatarès la manute dal podê triestin, a traviers i siei tradizionâi e fuarts santui jù par Rome… Che sei cemût che  sei sul cont dai tananais che a àn puartât a cheste nassince, al è palês che tai agns daspò Triest e à simpri cirût di stabilî rapuarts privilegjâts cun Pordenon. Chel che al è sucedût cu la Zonte Illy, dulà che il podê tai fats al è dispartît tra triestins e pordenonês, al è dome "l'outing" di une combine metude in pîs di unevore di timp in ca.

    And'è aspiets ogjetîfs e fondamentâi di superioritât politiche de prime sul secont. Triest e je une citât sustanzialmentri unide, dulà che dutis lis personis di un ciert pês si cjatin scuasit ogni dì intun limitât numar di salis, salots, lozis e cafês; lis comunicazions a son inmediadis, la definizion dai interès comuns e je facil, lis decisions curientis. Invezit il Friûl al è un slargjât teritori, cun dusinte Comuns, mîl cjampanii e une grande varietât di situazions; forsit al pese ancje cualchi trat culturâl di individualisim e localisim, che al rint dificil il cjapâ cussience, rapresentâ, prudelâ strategjis comuns. Triest e je stade par passe un secul une citât ungrum "cjarealcûr" dai italians, ogjet di fuartis passions risorgjmentâls e iredentistis, e lis sôs disgraciis dai agns 1945-54 j àn permetût di infuartî inmò di plui i rapuarts privilegjâts cul podê centrâl. Al contrari, par Rome il Friûl al è simpri stât (fale par curtis dadis, intal 1915-18 e intal 1976) une perifarie lontane, miserabil e discognossude; di tignî di vôli, controlâ, plui che di tignî cont. Triest e je stade un dai lûcs fuarts de culture italiane dal Nûfcent, e à vût un indis d'inscuelament unevore plui alt, e par otant'agns e à vût inte universitât une farie di risorsis umanis e di elaborazion di ideis. Il Friûl al à ocupât un puest cetant plui modest inte classifiche de culture e de instruzion e dome di vincjecinc agns in ca al à une propie universitât (parâtri, l'indis di furlanetât, valadì di inlidrisament tal teritori, dal ateneu furlan al reste unevore plui bas di chel de triestinitâ de consûr). Infin i furlans, popul di tradizion contadine, a àn paidît a lunc e, pal tant che al pâr lu paidissin inmò, di un naturâl complès di inferioritâ tai rivuarts de grande citât e a son passâts cence fladâ de sotanance a Vignesie ae sudizion a Triest. (raimont di strassolt)