Il mês di Jugn stât, ae fin dal an scolastic, alì de aule magne de scuele mezane di Tumieç al è stât presentâ il volum "Sulle orme di Giogio Ferigo - Un anno in classe: percorsi didattici multidisciplinari", realizât dai arlêfs e dai docents di chê scuele dilunc l'an scolastic 2008/2009 par talian e par furlan. Une iniziative verementri interessant, ancje par dâ di viodi che, se si vûl, a scuele la culture locâl e la lenghe furlane a puedin deventât mieç e ocasion par une incressite formative e culturâl. Dut il contrari di ce che a pensin i sorestants che a paronin tal palaç a Triest, che se mai a vessin di doprâ la marilenghe lu fasin dome par batudis di ostarie, come che al à fat il menadôr Tondo ae assemblee dal partît di Berlusconi a Rome. Ma al è dibant tirâ fûr lis solitis liendis, fintremai che a comandi chei alì nol è di spietâsi nuie di miôr, anzit magari ancje alc di piês.

    La vore, penze 192 pagjinis e cui tescj par talian e par furlan (i seconts curâts di Gloria Angeli), e je dividude in cinc cjapitui: "Zorç e la culture materiâl", "Zorç e la fotografie", "Zorç e i cramârs", "Zorç e la musiche" e "Zorç e la midisine", o sei ognidun dai centris di interès che a àn diferenziât la vite di Ferigo (1949/2007), miedi, storic, poete, musicist, scritôr, ambientalist e animadôr culturâl, bon di produsi oparis e di inmaneâ iniziativis come nissun in Cjargne, tiere de sô nassince e centri dai siei interès.

    Il lavôr, cemût che e à displeât la maiorent scolastiche professore Tiziane D'Agaro intant de presentazion, al è nassût cul intindiment di racuei i lavôrs realizâts dai arlêfs intant des ativitâts davueltis tal an 2008/2009 sul cont dal personaç di Comelians. Si tratave di musiche, di certificâts di miedi, di ricercje storiche o dal mût di valorizâ la marilenghe. E inmò, une costant che e ven fûr tal lavôr di Zorç Ferigo, o sei la capacitât di jessi diverzint, imprevedibil e disincjantât, di presentâ aspiets scontâts intune lûs dal dut divierse e veretâts scontadis come prejudizis o stereotips. Al savoltave vadì la trame di un mosaic par po tornâ a riproponilu cuntun gnûf disen.

    Biel che l'etnograf Zuan Pauli Gri tal so intervent al marcave che a svicinâsi ae storie de Cjargne a traviers Zorç Ferigo si scuvierç aspiets une vore diferents, chê altre muse ven a stâi. Naturalmentri une muse divierse di chê retoriche de mont emargjinade, grise, puare, indaûr. Si scuvierç impen une tiere diferenziade di complessitâts, mobilitâts, viertiduris, relazions slargjadis, capacitât di produsi e di fondi competencis diviersis, guscj e valencis artistichis, amôr pe musiche e par chel tesaur particolâr che e je la   propie   origjinâl   fevelade,   capacitât   di     fondi insiemit tradizion e modernitât. Volontât di frontâ i problemis, ma ancje volontât di reazion e progjets di cambiament.

    Naturalmentri di grant interès a son stadis ancje lis peraulis di Remo Cacitti (docent di storie dal Cristianisim antîc ae Universitât di Milan), che al à vût iniment la "fondamentâl" stagjon dai cramâr, argoment che   al   inviulà   Zorç  Ferigo   a  dedicai une impuartant

cunvigne tal 1996. Di chest event a forin po racolts di Zorç i ats,  publicâts intun volum curât parie cun Alessio Fornasin e titulât: "Cramârs. Emigrazione, mobilità, mestieri ambulanti della Carnia in Età Moderna" (1997). Lis crassignis puartadis a spale di chescj migrants no espuartarin dome, fra Cinccent e Sietcent, preseosis marcjanziis dilunc lis tratis lontanonis de Rain e de Donau, ma prodots sigûr mancul intrigants, ma di plui alt valôr, e a impuartarin in Cjargne ideis, istancis di riforme, di libertât, di solidarietât, a faserin in sumis vualmâ la utopie di un mont altri e contrari a chel dal control, de sotanance, des disparitâts, des prepotencis. Zorç Ferigo in sumis al jere stât bon di intivâ cun sapience lis divignincis storichis, culturâls e sociâls, di tornâ a ingropâ cun sapience i leams che a esistevin tra vieri e moderni e tra esperiencis passadis e contemporani, al veve savût, o sei, di brâf miedi dal spirt, ricostruî un complet inventari storic e formulâ une prognosi morâl e civiche par fâ jessi la mont furlane dal isolament e fâle cressi e svilupâ, come al "timp dai cramârs" juste apont, cuant che e jere stade plui europeane che mai.

    Peraulis testament sun chest cont a son chês che Zorç Ferigo al veve ditis intant di un congrès de Filologjiche, che si jere davuelt a Enomonç tal 2005 che lui stes al veve judât a organizâ curant la publicazion dal numar unic: "I vin volût tegni a ments la lezion dal grant storic Ernest Bloch, tal so libri 'Thomas Münzer als Theologe des Revolution', stampât tal 1921. Tal prin cjapitul, "Cemôt che si à di leilu", al scrîf cussì: "No i volin essi simpri e nomo tal nestri timp. Cussì, encje achì, nô no cjalìn indevûr. Ma, vîfs como che i sin, i si messedin cun chei che a no son plui. Di mût che encje lôr a tornino trasformâts, che i muarts a tornino a vivi, che la lôr vora a veti compiment encjemò una volta cun nô… Münzer al è, prin di dut, storia feconda, al è dut ce che al à fat, e dut ce che al è stât al merta di iessi contât achì par impegnânus, par sburtânus, par sostignî simpri cun plui fuarça il nestri permanent progjet". A cheste Cjargne vuê cussì stranide i mancje cetant Zorç Ferigo.

    In fin mi semee just vê iniment i docents che a àn puartât indenant chest  lavôr: Dino Zanier (chel che al à vût la idee e al à dât il sburt plui grant), e po Patrizia Pati, Annalisa Comuzzi, Gilberto Dell'Oste, Alessandra Ceschia, Silvia Marcolini, Gianna Gortana, Adriana Stroili, Maddalena Morassi, Alessandra Gargiulo, Renzo Francescatto e Paola Giovannacci. A lôr ur va come minim l'agrât dal assessôr Molinaro, che al predicje tant ben e al cumbine pôc, parcè che plui dai programs e des buinis intenzions par puartâ il furlan a scuele e covente passion e, soredut, la determinazion di imponisi. No i domandin di fâ il siopar de fan a oltrance (nol à la stature e la condurance di un Bobby Sands), e nancje di incjadenâsi denant dal palaç de regjon a Triest, ma di tirâ fûr e meti in vore dute la sgrimie che e covente par bati lis resistencis dai nemîs dal Friûl e de sô lenghe. (renzo balzan)l

 Vonde scusis! Vonde cjacaris! Vonde fum intai vôi!
La lenghe furlane a scuele daurmam!