Çurçuvint - Par cure de associazion “CjargneCulture” e pe golaine “Mito e Storia della Carnia”, za pensade e inmaneade di Zorç Ferigo, di resint al è stât publicât il saç (in realtât e jere une tesi di lauree) “Aganas - Le Agane in Carnia: tradizione orale, linguistica, toponomastica e archeologica” di Marina Lunazzi (pp.323).

    Al sclarìs inte presentazion Zuan Pauli Gri, che: “Lis Aganis a son figuris enigmatichis leadis ae aghe, ai forans, ai spazis che e stan oltri il soiâr domestic. A son svoladis ancje sul plan de memorie. Il confront fra lis testemoneancis racoltis in Cjargne insin ai agns Sessante dal Nûf cent e chês derivadis dal gnûf sistematic scandai puartât indenant di Marina Lunazzi al testemonie un procès di fuart lâ al mancul dal imagjinari mitic tradizionâl: Marina indi à rigjavat la impression di jessisi metude a lavorâ sul teren de antropologjie urgjent e indi à cuistât un dopli sintût impegn: etic (tal sens che e à vualmât il debit gjenerazionâl e l’oblic conseguent di recuperâ ce che al po sei recuperât e di cirî di salvâ la memorie coletive) e la direzion. Lavorâ su figuris come lis Aganis al è deventât inmò di plui un lavôr pareli a chel dai archeolics. A fâ i conts cun testemoneancis sparniçadis e framentadis, ve inalore l’oblic di procedi a traviers un recupar e une rigorose catalogazion, la dibisugne di cumbinâ testemoneancis divignintti  di documentazions di divierse nature di sotponi a une rigorose critiche des fonts, il prudêl a doprâ al miei lis proceduris dal confront comparatîf, il rispiet des regulis che al impon di meti il slaif aes ipotesis sugjestivis ”.

    Mentri la autore e sotlinie cemût che il so saç al à par ogjet lis Aganis: “figuris mitichis feminîls, presints inte memorie lezendarie di grant part dal teritori furlan, de Basse ae Cjargne, analizadis dal pont di viste de tradizion orâl, de linguistiche, de toponomastiche e de archeologjie, cuntun particolâr rivuart ae Cjargne. La Cjargne, in fats, come altris teritoris darest, e possêt une ricje tradizion di contis popolârs leadis a personaçs mitics e fantastics. Verzegnas, par esempli, il paîs dulà che o ai logât fint a za fa doi agns, al è famôs pal fenomen di chês feminis che si crodeve che a fossin possedudis dal demoni e pes leiendis leadis al Cjastiel Braulaç, ma, dal sigûr, al sarà stât tal imagjinari un torzeonâ pai boscs di personaçs mitics, cemût che si indi cjatin purpûr inte tradizion di dute la nestre Regjon. Une volte lis personis si tiravin adun ator dal fogolâr e in file intes stalis. In chestis ocasions a vignivin contadis  storiis ai fruts par faur passâ la dade, ma ancje par spaurîju. Leiendis e flabis a son il contâ di valôrs e principis che a vegnin doprâts in maniere simboliche par coinvolzi l’anim uman e a siervin come insegnament di vite. Magari cussì no i anzians che a contin liendis a son simpri di mancul e la tradizion orâl e je daûr a disparî.

    Ma lis Aganis sono pardabon esistudis? Une des rispuestis plui interessantis sun chest con tra chês cjapadis sù ator pe Cjargne di Marina Lunazzi e je cence altri chê di Domeni Adami, un artist scultôr che al loghe a Monai: “Las Aganes a stan intai flums che a si sglonfin e che a si secjin di corse. Cuant che o jeri frut o lavi inte Gladegne bessôl o cui miei fradis, o cui miei amîs, e o sintivi che a jerin ancje las Aganes. Se a passave une mi semeave che e tornàs a fasi viodi un moment dopo. A mi e a chei altris fruts nus vevin contât che alì dongje il riul a stavin platadis chestis feminis e par chest motîf nô o sintivin la lôr presince. Las  Aganes a son come nô, a fasin part de nestre vite. No sai ce che a son di precîs ma o sai che a son di sigûr e che a son dongje la aghe e ancje jo mi sint che o soi alì cun lôr. O sai che a son no parcè che a vebin un presince fisiche ma parcè che mi àn contât tant di lôr, lis àn tant vudis iniment di simpri. L’om lis sint parcè che al à imparât a savê i lûcs dulà che a son a stâ. E je une storie che e ven un grum di lontan  e che e resist tal timp e par chest las Aganes a son un valôr, si tramandin e no si puedin dismenteâ”.

    Cetant interessant al è ancje il cjapitul de toponomastiche che e à un riferiment cu lis Aganis. Cussì a Çurçuvint o vin il “Cret das Aganes”, un altris “Cret das Aganas” al è ancje a Maranzanis di Comelians, biel che tal daprûf Tualiis o vin i “Crets das Aganes”, e simpri un “Cret das Aganas” al esist in comun di Ravasclêt, impen a Rigulât e esist la “Buso das Aganos”. Se dongje des Aganis o metin ancje lis striis e chei altris personaçs de mitologjie cjargnele, la rieste si slungje di cetant. A Dimpeç o vin il “Poç da lis Striis”, a Doltris il “Cuel Salvan”, su la mont di Cjabie al esist il “Cjampùt dai Pagans”, a Cesclans e je une altre “Buse das Strias”, e simpri alì dongje, in comun di Cjavaç, a àn i “Fors dai Pagans”, naturalmentri parsore Çurçuvint e àn l'innomenât “Plan des Strie” , a Vinai si po lâ a viodi il “Cjiscjel dai Salvans”, biel che la “Capele dai Pagans” e esist a Treli.

    In fin al merete memoreât che la figure mitologjiche des Aganis e esist in dutis lis regjons dal arc alpin Orientâl, dal Trentin al Sud Tirôl, dal Cjadovri ai Carintie e al Cragn.

    In conclusion un libri coinvolzent sot cetancj aspiets, che al puarte un contribût impuartant ae riscuvierte, e soredut al recupar, de mitologjie de mont Furlane e Zuan Pauli Gri insom de sô presentazion al sotlinie juste apont che: “Cundut achel, las Aganes a restin ben lidrisadis. Lis tantis domandis su la lôr gjenesi e su la lôr storie, su lis lôr funzions e sul lôr mudâ, se no àn une rispueste, a àn almancul une base di dâts fondade pe formulazion di ipotesis fecondis, intai riferiments ae toponomastiche, inte definizion documentade dai rituâi pre cristians, inte ricostruzion des corints culturâls che a àn lassât une olme materiâl intes regjons alpinis”.  (von zercläre)