Carli Pup, nassût tal 1973, coordenadôr e animadôr dal “Comitât 482”, al lavore come redatôr a Radio Onde Furlane. Al è il curadôr, inte version par furlan, da “Il diari di Bobby Sands”, dulà che e je contade tragjiche storie de muart intes peresons iglesis dal eroi irlandês Bobby Sands, publicât tal 2001 de editrice Kappa Vu. Oltri a chest al è autôr di diviers articui e saçs storics e leteraris su la Irlande, e sun chês altris nazionalitâts minorizadis europeanis, publicâts su “La Comugne”, “La Patrie dal Friûl” e “Gnovis Pagjinis Furlanis”.

    Une militance nazionalitarie (furlane) dabon fuarte e coerent chê di Carli Pup, che no lasse spazis a piniis di sorte. La conferme la vin vude ancje di resint, leint il libri che al à publicât come suplement dal storic periodic “El Tomât” e che al à par titul “Memoriis platadis - Olmis di storie te narative popolâr furlane”. In chest saç l’autôr si propon di sgjavâ inte narative popolâr par ricercjâ elements che a puedi zovâ a tornâ a scrivi chei bocons di storie dal Friûl che, che purpûr vualmantju, no si ju rive a interpretâ, a sclarî, a daur la juste dimension e la juste valence ancje sot l’aspiet, sevi storic che soci-culturâl.

    E je resinte la presentazion inte sale Ajace a Udin dal libri “Il sogno friulano di Pasolini”, publicât di Paolo Gaspari, che al conte une des ultimis ribelions dai contadins furlans a San Vît dal Tiliment tal 1948. Fats che a cjaparin ancje Pier Pauli Pasolini che di chê esperience decisive al madresse la convinzion di deventâ comunist. Chê lote tra contadins (terenârs) e latifondiscj (parons di grandis estensions di campagne) e veve, in fats, di jessi il titul dal prin romanç dal poete di Cjasarse, publicât po tal 1962 cul titul “Il sogno di una cosa”. E je in efiets “Il sogno di una cosa” ce che al restave dal sium di un romanç, un progjet ambiziôs che tra il ’48 e il ’50 Pasolini al veve svilupât intor a diviers motîfs tematics cence rivâ a ricondusiju a unitât stilistiche e narative; indi restave il contignût origjinari de ribelion contadine dulà si insedarin un pocjis di prosis scritis intai agns Cincuante.

    Il libri di Pup al partìs de narative popolâr plui viere,  chê dai mîts, liendis e flabis che a cjatin une sorte di istituzionalizazion intai scrits e intes ricercjis di Catarine Percude, Achil Telin e Valentin Ostermann. Chescj personaçs daspò vê scoltadis lis contis de tradizion orâl de int venti ator pe Furlanie, lis trascrivevin daûr de lôr sensibilitât artistiche e leterarie. Un lavôr par tancj aspiets di grande valence, che al à permetût di salvâ tantis memoriis che se no a saressin restadis platadis par simpri. Personaçs “mitics” inte memorie popolâr furlane a ’nd è passâts cetancj: di Atile, a Magnus Maximus, de regjine langobarde Romilde, a Napoleon “chel dai spirons di aur”.

    Cundut achel un episodi centrâl de viere storie furlane, scrutinât a fonts di Carli Pup, al è chel de “Joibe Grasse dal 1511”, cuant che fulugnis di contadins armâts a la miei, e organizâts in bandis di vuerilie, a cjapin a metin a sac e a brusin palaçs e cjistiei de nobiltât, denant trat a Udin po e intes vilis dulintor. Cheste vicende e pararès insuazade inte lote in vore in Friûl tra Strumîrs e Çambarlans. I prins partesans dal Imperi, o sei pro todescs. I seconts, sot la direzion de famee dai Savorgnans, la plui siore de Furlanie, a jerin impen leâts e poiâts di Vignesie. In veretât la storie no je propite cussì, e juste Pup nus conte che de rivolte di Joibe Grasse e je invezit partide une lote di rivendicazion sociâl dal popul furlan plui mindic, che passant tra scuintris e lotis sanganosis al rivarà a otignî in fin il dirit ae costituzion di une rapresentance permanent des comunitâts rurâls che, tal 1533, e sarà istituzionalizade cul non di Contadinance. Un organisim unic tal panorame european di chei agns.

    A mertin insom vudis iniment ancje lis vicendis de “liberazion/ocupazion” dal Friûl de bande dai talians tal 1866. Tal libri si à iniment Riedo Puppo, che intune prose dabon uniche tal so gjenar, al conte cheste vicende. Il titul significât de conte al è “L’invasion dal ’66”. Riedo in partence al sclarì che: “La conti come che le à lassade scrite gno barbe Polo”. In veretât al è impen di imagjinâ che la vebi sintude a contâ de int, e che e fo une liende de tradizion popolâr orâl. La storie, che si la cjate publicade inte racolte “Par un pêl”, al è dabon il plui origjinâl, autentic e sclet document cuintritalian che a si puedi cjatâ fûr. Vuê si disarès “leiendis metropolitanis”, ma il stîl, le ande e la ferbince des nestris liendis non àn dabon nissune parintât cun definizions di chê sorte alì.

    In conclusion, Carli Pup al à fat dabon un biel libri, che al merte di jessi fat cognossi e fat lei a plui furlans che al è pussibil. Un rai di soreli cjalt e lusorôs che al ven fûr di un salustris, par rivâ a disfantâ lis masse fumatis che a imberdei inmò la “storie vere” de nestre tiere. In sumis un bon imprest didatic pai cors di lenghe e culture furlane che si fasaran (sperìn) intes scuelis de Furlanie.

La schede: C. Pup, Memoriis platadis - Olmis di storie te narative popolât furlane, (suplement al n° 3 / 2006 de “Il Tomât), Ed. Associazion Culturâl “El Tomât”, Feagne 2006, pp. 101