Davâr - “Clavais : il territorio, gli edifici e la Chiesa nelle carte Tavosco-Fedele”, al è un dai ultins libris publicâts de associazion “CjargneCulture” di Çurçuvint, curât di Luigi Raimondi Cominesi. L'autôr inte jentrade nus displee che si è metût a realizâ cheste publicazion cetant interessant daspò vê vût mût di scrutinâ e sistemâ i documents apartignûts a Aldo Tavoschi, nassût a Davâr tal 1906 e muart a Udin tal 1985, che si dedicà - cun interès bibliofil e cun passion di letôr, ae Librarie Tarantola di Udin, dulà che al jentrà inte conduzion tal 1931, cuant che si maridà cun Rosa Tarantola. Aldo Tavoschi al jere dabon un personaç interessant, a Udin, ancje a traviers de sô librarie, al intiessè rapuarts di cordialitât e di amicizie cui personaçs plui in viste de culture furlane. E fo par esempli la sô amicizie cun Zuan Batiste Corgnali e cun Gaetan Perusini che lu puartarìn a ricercjâ documents e testemoneancis su lis origjinis de famee, e dutun in chel a racuei notiziis su Clavaiis e su la Cjargne. In particolâr Aldo al mantignive in cheste maniere vîfs i interès culturâi, purpûr diviers, di so pari Gustâf e di so barbe Zuan, il prin segretari comunâl e poete, il secont passionât colaboradôr di Luîs Gortani in studis di caratar storic e folcloric.

    Di ducj chescj documents o vignìn cussì a savê - nus conte Luigi Raimondi Cominesi - che sul borc di Clavaiis si àn lis primis notiziis ciertis dal 1257 cuant che al jere metût adun di plui insediaments agri-pastorâi, rezûts di diviersis fameis sot il podê feudâl dai de Pinçan, dai Saorgnans e dal Patriarcjât di Aquilee. La frazion e je il lûc di dulà che e diven la origjin dal ram dai Tavosco-Fedele di Clavaiis, che si jere distacât ator ae metât dal 1700 dal çoc dai Tavosco di Comelians, Maranzanis e di Tavosc, che al risulte jessi juste apont un toponim di probabil divignince langobarde. Cheste ultime localitât e compâr inte descrizion dai “Fûcs” de “Contadinance dal Cuartîr di Guart” (1539), ancje  se sul so cont a esitin notiziis plui vieris, dal 1418 e dal 1421.

    I Tavoscs di Clavaiis a àn come basavon Jacum, nassût tal 1737 a Comelians, fi di un nodâr di buine fortune e lui stes nodâr. So mari e jere Ursule, fie di un Fedêl di Clavaiis, paur e marcjadant. Cuistât il cognon de mari, Jacum si firmà Tavosco-Fedelli, ma ancje Tavosco-Fedele. Tal 1755 al maridà Madalene Samassa, di Mieli, fie di Nicolau e di Marie Wezel. Jacum al cjapà sù l'incarghe, oltri al compit di aministradôr des propietâts di cjase, di persone interessade ae cjosse publiche come merighe, public perît e  nodâr cuntun propi sigjîl e, in fin, ancje chel di mestri di scuele. Ma soredut al à il mert di vê metût jù, o ben di vê trascrits, documents che a cjapin dentri un spacât di cjossis intor di lui di Clavaiis e dal Cjanâl di Guart.

La famee di Jacum e Madalene e lè a logâ in chê che a clamavin “Cjase Domenicâl” e che vuê e je cognossude come “In Fedêl”, al centri di un slargjât complès autosuficient, almancul fintremai sul scomençâ dai agns Setante dal secul diesim-novesin.

    Jacum al murì tal 1775, a 38 agns. Dîs agns daspò e murì Madalene; ducj i doi a vevin testât intes mans di Andree Colinas, nodâr di Liariis, amì di cjase. I lôr bens a vignirin dividûts fra i fîs e lis fiis. Cussì al vignì dismembrât il slargjât patrimoni che a vevin ereditât, e po ancje incressût cuntun aministrazion atent e savint. Vadè che Jacum Tavosc-Fedêl al è une des plui evidentis espressions de Comunitât di Clavaiis dal 1700 che al à lassât olme di sé tal contest soci-economic dulà che al è vivût; naturalmentri cu la mentalitât propie dal timp e de classe sociâl che al apartignive.

    Interessant in cheste libri, oltri aes diviersis descrizions di Clavaiis dilunc lis etis, il recupar dai toponims e dai microtoponims sparniçâts sul teritori, ducj par cjargnel come: Fornas Viera, Braida di Tauz, Lipît, Somvoras, Clava, Cjasaruelas, Cuestula, Valpojas-Grivora, Rusglesia, Prât du Cumun, Plait Somvales, Pramajor, Reonaç, Agâr da l'Aga, Riba di Petec, Tramidas, Pustêt, Cuadri, Navens, Curva dal Cret, Predêt e Ombladîs. Al merte in fin ricuardât che il libri al jes pe golaine “Mito e storia della Carnia”, curade par CjargneCulture di Zorç Ferigo, dulà che a son stâts bielzà publicâts libris interessants come “La Carnia in Età moderna - Oltre Linussio”, “Cultura materiale in Carnia - Fonti, ideologia, realtà”, “Il popolo duro - Rivalità, Indentità e Struttura Sociale in una valle alpina”, “Dizionari toponomastic di Darte”, “Usi civici e proprietà collettive in Carnia tra Antico regime ed Età Contemporanea”, “Ancora tra lingua e letteratura”. (von zercläre)