Udin - Di resìnt te Basiliche di Madone di Gracie, a Udin, si è davuelt un conciert di presentazion dal volum e dal CD "34 Inni per l'Anno liturgico di David Maria Turoldo", cun tescj musicâts dal composidôr triestin Marco Sofianopulo. L'opare e je stade buride fûr par cure dal editôr Pizzicato.

    Cetant che pari David Maria Turoldo al amàs il cjant lu san ben i siei amîs furlans, tant al è vêr che ur domandave simpri di dâ sù cualchi vilote cuanch'al veve l'ocasion di cjatâju, sevi chenti in Friûl che fûr di chenti pal mont. Ch'al amàs il cjant sacri lu testemoniin la ferbince e l'impegn ch'al meteve tal tradusi in metriche ducj i cent e cincuante salms dal salteri, e a jere grandone la gjonde che lu cjapave tal sintî i contadins di Fontanella di Sotto il Monte ch'a cjantavin dilunc il lavôr tai cjamps atôrvie l'antighe badie.

    Lu inderedavin invezit i tescj di tancj cjants ch'a vignivin doprâts te plui part des glesiis, sore il dut tal timp post-conciljâr: e  la puaretât culturâl, la pocjece teologiche che si cjatave in chei tescj e fo une des resons che lu àn inviulât a cirî di cjatâ la mende. Cussì, daspò vê completât la version dai salms in forme metriche, Turoldo si metè a l'opare par completâ une rieste di cjants (imnis) par dut l'an liturgic. Grant al fo il sostegn ch'al vè de sô comunitât (chê dai Sierfs di Marie n.d.r.), e in maniere particolâr di pari Bernardino Zanella, che cumò al vîf tune comunitât dai Sierfs di Marie in Chilì, cemût che purpûr pari David al ricognòs te jentrade al prin dai siet libris di cjants ch'al realizà in pôc plui di doi agns, tra il 1980 e il 1982:

"Al è a gno fradi di vite in munistîr Bernardino Zanella, frari come me tal Ordin dai Sierfs di Sante Marie, ch'o intint dediâ cheste me gnove fadie: dal sigûr la plui lungje e impegnative tra lis tantis ch'o ai frontât in chescj agns: fadie ch'e continue te tremende traduzions dai salms…Un'opare ch'e je il complement di chê âtre, so svilup naturâl".

    I cjants di Turoldo, scuasit une icone poetiche, a nassin de prejere e de riflession sui tescj liturgics: tancj di chescj a semein nassûts  des stessis liturgiis de fieste,  dulà che lui al ricuardave simpri che oltri che par preâ insiemit si jere alì ancje par capî. Al zontave la fadie dal crodi a la fadie de prejere e aduncje ancje a la fadie dal cjant. Al diseve in fats: " Cui  riscjarajal vuê di metisi a cjantâ, cuanche o paidìn l'angosse di une storie di oms feride de muart e dal odi, de disperazion e de smare?" Dal sigûr no ducj i tescj di pari David a son biei e riessûts. Lui stes, a voltis, jessint dal so studi al diseve: " No rivi a cumbinâ nuje, no mi ven nuje" e al ricognosseve ch'al jere cetant sfadiôs rivâ a vê simpri gnovis ideis.

    Ma al saveve ancje ricognossi cuanche un test al jere riessût benon: al fo par esempli cetant apajât da "Vieni di notte" une salmodie pal timp dal Avent ch'e à vût un sucès e une difusion slargjade, ancje s'e je stade pôc doprade sul plan musicâl. Un âtri test che lu veve adimplen apajât al jere l'imni par Pasche Tafanie, "Eran partiti da terre lontane". Si rifletin achì tancj siei discors su la fede, su la dificultât e su la diviersitât dal crodi: dispès tes sôs predicjis al ripeteve che tancj "a cròdin di crodi", come che âtris "a cròdin di no crodi".

    E cemût no vê iniment un dai cjants componûts in onôr de Virgjine Marie di lui che si sintive erêt dai antîcs Laudês,  i grops de Ete di Mieç di dulà ch'a divignivin i fondadôrs dai Sierfs di Marie, cjatôrs de bielece di Diu e dal creât? Cundutachest une des fadiis plui feliçs di Turoldo e fo la traduzion in meditazion poetiche dal "Magnificat", l'innomenât imni dal evangjelist Luche. Cussì pari David si domandave: Cemût podîno cjantâti, o Mari,/ cence conturbâ la tô santitât?/ Cence ofindi il to cidinôr?". Al veve simpri pôre di disturbâ o di no rindi in mût adeguât ce ch'al sintive.

    Sigûr nol è facil componi musichis adeguadis a tescj cussì impegnatîfs e obleâts de metriche. Par chest l'opare ch'e je stade presentade te Basiliche di Madone di Gracie e merte une segnalazion particolâr, dal rest il mestri Sofianopulo al à savût ben leâ i tescj di Turoldo cun tune propueste musicâl di grande cualitât. E cheste volte Turoldo, ch'al diseve: "Cuanche mi soterais lassait un piçul spazi viert cussì ch'o puedi ogni tant viodi e scoltâ inmò i salms e i imnis ch'a vègnin cjantâts", dal cîl al varà dal sigûr plausât di cûr chest riessût conciert.  (von zercläre)

 www.donneincarnia.it  -  storie, culture,  informazion,
 leteradure, fats e gnovitâts de Cjargne e des sôs Vals

    E va dilunc la trate, chê tra i mîts, lis flabis e lis lejendis dal Friûl storic, inviade dal Institût di ricercje Achîl Tellini zà fa un pôs di agns indaûr cu la publicazion dal prin volum titulât "Tiaris di Acuilee", une induvinade golaine curade dal editôr Vigj Cjandèt di Reane dal Rojâl. Daûr di chel prin volum a son jessudis lis ricoltis "Cjanâl dal Fiêr" (1999), "Tiaris di Cividât e de Badie di Rosacis (2000), "Tiaris di Tisane e di Puart" (2000), "Lagune de Gravo e de Maran" (2002). Ultin de rieste, vignût fûr zà fa cualchi mês de stamparie, il sest volum al è dediât al "Friûl des Culinis", ossei ai cumuns di Atimis, Cjassà, Faedis, Nimis, Pagnà, Paulêt, Reane dal Rojâl, Tacìnt, Tavagnà, Trep Grant e Tresesin.

    L'interès pal patrimoni naratîf popolâr al è simpri vîf, anzit, in cheste ete di grancj mudaments antropologics, di dismenteancis e di pôc timp di dediâ a stâ a scoltâ cualchidin ch'al conte, a ricuardâ ce che nus è stât pandût come testemoneance, al cuiste une valence particulâr e al rapresente la glagn che nus coleghe cul passât.

    Domeni Zannier te jentrade nus sclarìs sun chest cont che: " Su lis tematichis des flabis, dai mîts e des lejendis s'inmanie chê che in sens cumun e ven definide leteradure orâl e popolâr. Si trate vadè di une leteradure "ante litteram", trasmitude a vôs a traviers generazions, che dispès e je stade fate propie da scritôrs innomenâts par un pôcjis des lôr oparis in diviers Paîs. Flabis, mîts e lejendis, insiemit cui proverbis e i cjants popolârs, lis usancis locâls e lis danzis, si proponin come folclôr, come sapience dal popul. Folclôr e tradizions popolârs a son la midiesime realtât ta l'acezion plui pure e esate dal tiermin. Al è aduncje necessari disferenziâ tra flabis e lejendis e mîts, ma cun tune cierte discrezion parcè che il passât, ancje storic, si smavìs tes mudancis dai colôrs dal a mont e tes fumatis tardivis. O fevelìn di documents ancestrâi. La flabe 'e à tiessûts generics a l'interie umanitât europeane, asiatiche e africane, ma a esistin originalitâts locâls, che nus dan la testemoneance di un lidrisament tun determinât teritori e di une evoluzion culturâl propie. Il mît e je la prime espression di une cosmologie e di une antropologie intuitivis a la ricercje di une veretât esistenziâl, ch'e ven denant trat a l'esercizi sistematic des categoriis razionâls. I mîts eziologics a intindin esplicâ causis di fats e realtâts".