RADÎS CRISTIANIS E IDENTITÂT EUROPEANE

Zuanfranc D'Aronco e la
"Cuestion  Furlane"
 

Sëlva/Wolkestein in Gröden (Bz) - Zà fa cualchi mês al è jessût l'ultin numar di "TRAS - Forum Culturel" (Revista de leteratura y ert) buride fûr par cure de Lia Scritoures "Scurlins". Si trate dal nr.9 /2002 curât par chel che s'inten la redazion di Marco Forni e Roland Verra, mentri diretôr responsabil al è Georg Mussner. Tem di chest numar al è "Arcipel ladin" e a àn colaborât, oltri a Forni e Verra, ancje Rut Bernardi, Vigilio Iori, Ulrike Frenademez e Stefen Dell'Antonio. Propit dal interessant contribût di Vigilio Iori, o publichìn culì sotvie la part plui significant.
 

    Parcè chest titul? Parcè isule globalizade? Al podarès sugjerînus, tal nestri câs specific dulà che si fevele di leteradure, l'idee di une piçule entitât colonizade da un, claminlu cussì, grant continent aromai colaudât a caparâsi  gnûfs teritoris di concuiste; o l'idee di une isule dulà che il mâr che lu torcene no la protêç plui; o inmò l'idee di une pierdite definitive o almancul inminent da l'identitât; e cetantis âtris cjossis inmò…Dut chest al po’ jessi vêr, come ch'al jessi vêr il contrari. Dut al dipent, secont il gno pensâ, di cemût che si sintisi e in cuâle posizion che si va metisi come isule in relazion al fenomin de globalizazion, e aduncje, tal nestri câs, dal confront cun culturis plui fuartis e plui slargjadis.

    Al è probabilmentri rivât il moment di superâ une considerazion de culture minoritarie come une realtât statiche, ch'e conserve la propie identitât justeapont in relazion al so scjars dinamisim e magari al so isolament; cussì come ch'al è plui che evident che aromai il timp dal relatîf isolament geografic (simpri ch'al sedi esistût) - no dome pe realtât ladine - al è rivât insomp e che aduncje ancje cui ch'al vîf tune aree minoritarie al scugne confrontâsi cu lis stessis problematichis presìnts par ogni dontri tal marimont, cu la prionte di un'âtre: chê da l'apartignince a une minorance.

    Cemût ch'al dîs justamentri Marco Forni, se il procès di globalizazion al smire impreteribilmentri al vuajament des culturis locâls e des microrealtâts, ta chel istès timp, ancje propit come rispueste a la tindince al nivelament e a l'omologazion, si asist ancje al palesâsi di dibisugnis profondis di ricognossiment d'identitât e di diviersitât.

    La leteradure ladine dal dì di vuê e palêse simpri di plui, e di plui parts, la dibisugne di misurâsi cu la contemporanietât (cence par chest rinunziâ a fâ i conts cu la cognossince de propie tradizion), e chest nol è sintût come dibisugne di "misurazion" tal sens di "mensure", o di confront tal sens agonistic dal tiermin, ma ben invezit come espression e comunicazion artistiche, compagn di chês âtris esperiencis leterariis, grandis e piçulis ch'a sedin.

    In realtât si asist te leteradure ladine di vuê al disberdeasi dai leams ch'a podaressin jessi ricondusûts a un sotstrât di stamp tradizionâl par cirî gnovis tratis, intindudis come plui congeniâls al sintî dal sengul autôr. E ancjetant, viodude ancje la scjarsetât de produzion in lenghe ladine - par resons palês - si paidìs il malibiament e di conseguence ancje l'influence di leteraduris, claminlis, forestis. Ma chest al sucêt in dutis lis esperiencis leterariis: cui instruments comunicatîfs a nestre disposizion o podìn cumò jessi malibiâts e condizionâts di plusôrs âtris esperiencis. E ch'e sedi la ben vignude cheste influence. Al sta po al sengul scritôr rivâ a esprimi la propie individualitât.

    Ma a chest pont si rive a la scuvierte evident che l'isule - par ripiâ la glagn de metafure - forsit no esist plui. Cundidì no esist plui une leteradure ladine cun tune propie specificitât che la disferenzii di âtris leteraduris. L'unic caratar disferenziant al è l'ûs dal instrument lenghistic (e, o dîs jo,èsal forsit pôc?). (Vigilio Iori - test voltât par cure de redazion)

ZORAN MÙSIC AL TORNE TE SÔ GURIZE

Gurize - Il dubi. Di jessi,  l'origin, il fin, da l'inspirazion. Anton Zoran Music al è l'om dal dubi. Al è nassût a Gurize tal 1909, ossei zà fa 96 agns, cuanche il capolûc dal Friûl di Jevât, vuê al centri de gnove Europe che si sta metìnt adun, al jere inmò guviernât di Cjase d'Austrie. Al à vivût in Dalmazie, ma ancje in Carintie, a Viene, Zagabrie, Madrid, Parìs e Vignesie, si lei te straordenarie originalitât dai siei autolitrats, dulà che il blanc e il neri a son i unics colôrs a marcâ i contôrs da l'anime, il valôr esteriôr de piture di Music, no condizionade dal misteri da l'Academie, ma ben invezit da l'etiche de vite. L'essenziâl palete dai colôrs dal maestri, ch'e va dal narant al neri e no cognos, par esempli il vert e il ros, e palêse la mancjance di ciertecis. Parcè chest? "Tal mût di contâ lis ciertecis chestis a puedin puartâ dome a la violence". I dogmis, i messaçs universâi no fàsin part de complessitât di Music, un om e un artist. Vè parcè che i colôrs apene fissâts su la tele di dulà che si scuarç la trame, a puedin pardabon cjapâ, o miei malibiâ, cui ch'al cjale.

    I paesaçs dal Cjars cussì in tune cu la int che ju loghe, i celebrâts cjavâi de Dalmazie, o i cuei sorevie Siene e la lûs fuscade de Giudeche, no dan afàt sigurecis a son fats di cidinôr e vìnt animâts di sunsûrs e di invisibilis presincis. No si po’ no tignî cont, cjalant chestis oparis, de conturbant presince di chei cadavars che Music al viodè a Dachau e al rapresentà, come une sorte di testament ch'al gambià ancje l'inspirazion dal artist. Chês bocjis cidinis e daviertis, ma che berlin il cidinôr.

    Al è un tornâ tant spietât chel di Music te sô Gurize, une tiere che j è restade dentri e che inmò vuê al descrîf e al ricuarde cun grande dolcece. Gurize, o Görz o inmò Gorica (la sô lenghe mari al è il sloven) e spiete il maestri, tal mês di utubar cu ven, cu la mostre plui complete che j sedi mai stade dediade chenti. L'esposizion e je stade inlustrade justeapont a Milan tal mês di març stât te cente de presentazion dai ancjaments 2003 di Liniis d'ombre.

    La mostre e je stade nunziade come un dai plui significants apuntaments cu l'art a nivel european e i organizadôrs a àn pensât a une sorte di trate, ch'e cjaparà dentri, oltri a Gurize ancje Belun e Conean pe visite a dutis lis sedis espositivis. In mostre, tressade fra lis sedis di palaç Attems e dal cjscjel, si podaràn amirâ circje 150 oparis dal maestri gurizan. Fra chestis, si cjàtin ancje dai inedits, sore il dut rivuardant dissens fats tal timp de prisonie a Dachau. Dutcâs a saran cjapâts in considerazion ducj i ciclis pitorics ch'a àn rindût internazionâl l'innomine di Music, comprindudis un pôcjis di telis pôc cognossudis realizadis tai agns Trente.

    La trate espositive e sarà curade dal cumitât sientific, dulà ch'al è dentri ancje Jean Clair, diretôr dal museu Picasso di Parìs e Paolo Rizzi, e seguît de famee dal artist. L'om dai dubis, Music, aduncje, siben in sedis e citâts diviersis, metût a pareli ai impressioniscj e cjapât dentri tun circuit di visitis di fuart riclam. A nô e a lui, int dal Jevât dulà ch'e s'insedin e s'incrosin lenghis, culturis e esperiencis artistichis, dulà che la buere e sofle ferbinte e a voltis e ribalte ogni cjosse, mentri in âtris si stramude tun vintisèl zentîl, juste come chel ch'al passe su lis sôs telis.   (von zercläre)